વડોદરાના અલકાપુરી વિસ્તારમાં જીમમાં આગ લાગતાં અફરાતફરીનો માહોલ.

વડોદરાના અલકાપુરી ખાતે આવેલા બેલેન્સ વર્ક જીમમાં આગના બનાવથી ભારે અફરાતફરીનો માહોલ સર્જાયો હતો તેમજ જીમનો તમામ સામાન બળીને ખાખ થઈ ગયો.

વડોદરાના અલકાપુરી વિસ્તારમાં આવેલ બેલેન્સ વર્ક જીમમાં આજે સવારે અચાનક જ શોર્ટસર્કિટના કારણે આગ લાગતાં અફરાતફરીનો માહોલ સર્જાયો હતો. જીમના સંચાલકનું કહેવું છે કે શોર્ટસર્કિટના કારણે આગ લાગી હોય જેમાં જીમને લગતો તમામ સામાન, એસી, એલસીડી બળીને ખાખ થઈ ગયા હતા. તાત્કાલિક ધોરણે વડીવાડી ફાયર સ્ટેશનને જાણ કરવામાં આવતા સમગ્ર ફાયર કાફલો ઘટનાસ્થળે દોડી ગયો હતો પાણીનો મારો ચલાવી આગ પર કાબુ મેળવવાના પ્રયત્નો હાથ ધર્યા હતા, સદ્નસીબે આ બનાવમાં કોઈ પણ પ્રકારની જાનહાની થઈ નથી.