ભરૂચ જીલ્લાના ઝઘડિયા તાલુકાના ઉમલ્લા પોલીસ મથકની હદમાં આવેલ પાણેથા ગામેથી ભરૂચ એલસીબીની ટીમે ગતરોજ ભારતીય બનાવટના વિદેશી દારુની નાનીમોટી બોટલો તેમજ બીયર ટીન મળીને કુલ રુ.૮૨૭૦૦ નો મુદ્દામાલ ઝડપીને આ ગુના અંતર્ગત પાણેથાના અજય ખોડા વસાવાને વોન્ટેડ જાહેર કર્યો હતો.
ઉલ્લેખનીય છેકે ઉમલ્લા ગામે ગતરોજ જુના પીએસઆઇની વિદાય બાદ નવા આવેલ પીએસઆઇએ આજરોજ ચાર્જ લીધો છે, ત્યારે આ નવા આવેલ અધિકારી હજુ આ વિસ્તારની ભૌગોલિક પરિસ્થિતિથી વાકેફ ના હોય તે સ્વાભાવિક ગણાય. આ દારુ ઝડપાવાની ઘટના બની છે તે જોતા ફલિત થાય છેકે આ પંથકમાં લાંબા સમયથી વિદેશી દારુનો વેપલો થઇ રહ્યો છે. ઉલ્લેખનીય છેકે ઉમલ્લા નજીકના અછાલિયા ગામે ગત તા.૨૮ – ૫- ૨૧ ના રોજ રુ.૨૫ લાખની માતબર રકમની ચોરી થઇ હતી, અને તેનો આઘાત લાગતા ઘરના મોભીનું હાર્ટ એટેકથી મોત થયું હતું. આ ચોરીનો ભેદ મહિનાઓ વિતવા છતાં પણ તત્કાલીન પોલીસ અધિકારી ઉકેલી શક્યા નહતા, જેને લઇને પંથકની જનતામાં રોષની લાગણી ફેલાઇ હતી. દિવસો વિતવા સાથે અછાલિયાની આ ચોરીની ઘટનાનો ભેદ પણ જાણે ભુતકાળ બનીને અતીતમાં ગરકાવ થઇ જશે એમ હાલતો લાગી રહ્યું છે.
ગુલામહુશેન ખત્રી રાજપારડી જી.ભરૂચ
