નવા વર્ષની પૂર્વ સંધ્યાએ ઝઘડીયાના પડવાણીયા ગામેથી વિદેશી દારૂ પકડાયો હતો. તાલુકામાં પોલીસ દ્વારા ઉપરાછાપરી વિદેશી દારૂ પકડાતા તાલુકામાં ગેરકાયદેસર દારૂનો ધંધો કરતા બુટલેગરોમાં ફફડાટ ફેલાયો હતો.
પ્રાપ્ત વિગતો મુજબ ભરૂચ એલ.સી.બી. નાં જવાનો ઝઘડીયા પોલીસ મથકનાં વિસ્તારમાં પેટ્રોલિંગમાં હતા ત્યારે બાતમી મળી હતી કે પડવાણીયા ગામના ગુલા ફળીયા ગામે રહેતો શશીકાંત હરીસીંગ વસાવા પોતાના ઘરે ગેરકાયદેસર રીતે ભારતીય બનાવટનાં વિદેશી દારૂનું વેચાણ કરે છે. પોલીસ જવાનોએ બાતમીવાળા સ્થળે રેઇડ કરતા અલગ-અલગ બ્રાન્ડની વિદેશી દારૂની બોટલો મળી આવી હતી. પોલીસે સ્થળ પર હાજર શશીકાંત વસાવાની પૂછપરછ કરતા દારૂનો આ જથ્થો તે ઝઘડીયા તાલુકાના માલજીપુરા ગામેથી છુટક વેચાણ કરવા ખરીદી લાવ્યો હતો.પોલીસે હસ્તગત કરેલ આરોપી શશીકાંત હરીસીંગ વસાવા રહે.ગુલા ફળીયા પડવાણીયા તા.ઝઘડીયા તથા નહિ પકડાયેલ અન્ય આરોપી રાજકુમાર ઉર્ફે લાલો વસાવા રહે.માલજીપુરા તા.ઝઘડીયા વિરુદ્ધ એલ.સી.બી. પો.કો.જયરાજભાઇ ભરતભાઇએ ઝઘડીયા પોલીસ મથકે ફરિયાદ લખાવી હતી. પોલીસની આ રેઇડ દરમિયાન સ્થળ પરથી મળી આવેલ રૂ.૩૫૦૦ ના મુદ્દામાલ સાથેનો વેચાણ માટે રાખેલ વિદેશી દારૂ કબ્જે લીધો હતો. ઝઘડીયા તાલુકામાં ઉપરાછાપરી વિદેશી દારૂ ઝડપાતા બુટલેગરોમાં નાસભાગ મચી જવા પામી હતી.
ગુલામહુશેન ખત્રી રાજપારડી જિ.ભરૂચ
