ભરૂચ જિલ્લાના ઝઘડીયા નગરના ત્રણ રસ્તા પર એક ઇસમના શર્ટના ઉપરના ખિસ્સામાંથી કોઇ ગઠિયો રૂ.દસ હજારની ચીલઝડપ કરીને ભાગી ગયો હોવાની ઘટના બનવા પામી છે.
ઝઘડીયા પોલીસમાંથી મળતી વિગતો મુજબ ઝઘડીયા તાલુકાના નાનાસાંજા ગામે રહેતા ધર્મેન્દ્રસિંહ હિંમતસિંહ ચૌહાણ નિવૃત્ત હોઇ, તેમના પેન્શનની રકમ બેન્ક મારફતે આવે છે. તા.૩ ના રોજ તેઓ પેન્શનના પૈસા ઉપાડવા ઝઘડીયા આવ્યા હતા. ઝઘડીયા કુમારશાળા નજીકના એક બેન્ક એટીએમમાંથી રૂ.દસ હજાર ઉપાડીને તેઓ ઘેર જવા માટે ઝઘડીયા ત્રણ રસ્તા પર આવ્યા હતા. બસની રાહ જોતા તેઓ ત્રણ રસ્તા પરના બસ સ્ટેન્ડની પાળી ઉપર બેસીને પેપર વાંચતા હતા ત્યારે કોઇ ચોર ઇસમ તેમના શર્ટના ઉપરના ખિસ્સામાંથી રૂ.દસ હજારની ઉઠાંતરી કરીને ભાગી ગયો હતો. આ અંગે તેમણે ઝઘડીયા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
