ભરૂચ જિલ્લાના ઝઘડીયા તાલુકાના એક ગામે રહેતી સગીર વયની યુવતીને લગ્ન કરવાના ઇરાદે ભગાડી જવા બાબતની ફરિયાદ પોલીસમાં લખાવા પામી છે.
મળતી વિગતો મુજબ આ સગીરાના પિતા ગત તા.૭ મીના રોજ બહારગામ ગયા હતા. ઘરે પાછા આવ્યા બાદ તેમની પત્ની દ્વારા જાણવા મળ્યુ કે તેમની સગીર વયની દિકરી બપોરના સમયે ઘરના વાડામાં ભેંસના પાડ્યાને પાણી પાવા ગઇ હતી, ત્યારબાદ તે ઘરમાં પાછી આવી નહતી. ત્યારબાદ તપાસ કરતા જાણ થઇ હતીકે તેમની દિકરી ગત તા. ૬ ઠ્ઠીના રોજ ગામનાજ એક યુવક સાથે જોવા મળી હતી. તેથી આ યુવક તેમની સગીર વયની પુત્રીને લગ્ન કરવાના ઇરાદે ભગાડી ગયો હોવાની શંકા જતા સગીરાના પિતાએ યુવકના ઘરે જઇને તપાસ કરતા તે યુવક પણ તેના ઘરે જણાયો નહતો. તેથી યુવક તેમની સગીર વયની દિકરીને પટાવી ફોસલાવીને લગ્ન કરવાના ઇરાદે ઘરના વાડામાંથી લઇને નાસી ગયેલ હોવાનો વહેમ ગયો હતો. ગુમ થયેલ સગીરાની કોઇ ભાળ ન મળતા તેના પિતાએ યુવક વિરુધ્ધ ઉમલ્લા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
