ભરૂચ જિલ્લાના ઝઘડિયા તાલુકામાંથી વહન થતાં ખનીજ તેમજ બોડેલી તરફથી આવતા ઘણા રેતી ભરેલા ઓવરલોડ વાહનના ચાલકો સરદાર પ્રતિમા ધોરીમાર્ગ પર આડેધડ અને બેફિકરાઈથી વાહન ચલાવતા હોઇ અકસ્માતની ઘટનાઓ અવારનવાર બનતી રહે છે. ગત મોડીરાત્રે ઝઘડિયા તાલુકાના રતનપુર અને વાઘપુરા ગામ વચ્ચે બોડેલી તરફથી રેતી ભરીને ઝઘડિયા તરફ આવી રહેલી એક ટ્રક રોંગ સાઇડ પર પલટી મારી ગઇ હતી. ટ્રકના ચાલકે ડિવાઈડર પર ગાડી ચઢાવી દેતા રોંગ સાઈડ પર ટ્રક પલટી મારી જવા પામી હોવાની વિગતો જાણવા મળી છે. જેના કારણે ઝઘડીયાથી રાજપારડી તરફ જતા ધોરીમાર્ગ પર આવતા જતા વાહનો અટવાયા હતા. રેતીની ટ્રકે પલ્ટી મારી જતા બન્ને તરફના રોડ પર રેતી વેરણ છેરણ થઇ હતી અને વાહન ચાલકોને વાહન ચલાવવામાં મુશ્કેલી પડી રહી હતી. સદભાગ્યે આ ઘટનામાં કોઇને ઇજા થઇ નથી. ડીવાઈડર પર ટ્રક ચઢી જતા ટ્રકના આગળના બન્ને વ્હીલ છૂટા પડી ગયા હતા, જેથી ટ્રકને મોટું નુકસાન થયાનુ જણાઈ રહ્યું છે.
ગુલામહુશેન ખત્રી રાજપારડી જિ.ભરુચ
