ભરૂચ :
ભરૂચ શહેરમાં ૨૯મી ઓક્ટોબરના રોજ ૧૨૫થી વધુ સોસાયટીઓમાં વીજળી સાથે પાણીની સમસ્યા સર્જાશે. દક્ષિણ ગુજરાત વીજ કંપની દ્વારા પાંચબત્તી સબસ્ટેશન હેઠળના પાંચ ફીડરમાં મેઈન્ટેનન્સની કામગીરી હાથ ધરવામાં આવનાર હોવાથી સવારે ૭થી સાંજે ૫ વાગ્યા સુધી વીજ પુરવઠો બંધ રહેશે.
આ કામગીરીમાં ૧૧ કેવી નંદીની, એપીએમસી, અવધૂત, ટોરેન્ટ અને શક્તિનાથ ફીડરનો સમાવેશ થાય છે. વીજકાપને કારણે માતરિયા ઇન્ટેકવેલ પર પણ વીજ પુરવઠો બંધ રહેશે. પરિણામે ભરૂચ નગરપાલિકા સંબંધિત વિસ્તારોમાં સવાર અને સાંજનો પાણી પુરવઠો આપી શકશે નહીં.
નગરપાલિકાએ અસરગ્રસ્ત સોસાયટીઓના રહેવાસીઓને પીવા અને ઘરવપરાશ માટે જરૂરી પાણીનો અગાઉથી સંગ્રહ કરી રાખવા અપીલ કરી છે. સાથે જ પાણીનો કરકસરપૂર્વક ઉપયોગ કરવા જણાવ્યું છે. નગરપાલિકાના જણાવ્યા મુજબ, ૩૦મી ઓક્ટોબરથી તમામ વિસ્તારોમાં નિયમિત પાણી પુરવઠો શરૂ થઈ જશે.
