ભરૂચ નગર પાલિકા હદ વિસ્તારમાં આવેલ કતોપોર બજાર માર્ગ અત્યંત બિસ્માર બન્યો હોય તેવી સ્થિતિનું સર્જન થયું છે. નગરપાલિકાના વોર્ડ નંબર ૧૦ માં આવેલ આ વિસ્તારમાં મુખ્ય બજાર હોય રોજના હજારો લોકોની અવરજવર અહીંયાથી થતી હોય છે, પરંતુ ચાલુ વર્ષે વરસાદી માહોલ બાદ આ વિસ્તારના રસ્તા બિસ્માર બની ગયા હોવાની બુમો લોકો વચ્ચેથી સામે આવી રહી છે.
ભરૂચનો હાર્દસમાં કતોપોર બજાર વિસ્તારમાં શાકભાજી વિક્રેતા સહિત કપડાં અને વેપાર ધંધા કરવા માટેની હજારો દુકાનો અહીંયા આવેલી છે, જ્યાં અનેક વેપારીઓ પોતાનો રોજગાર મેળવી પરીવારનું ગુજરાન ચલાવી રહ્યા છે, તો બીજી તરફ બજારમાંથી પસાર થતો મુખ્ય માર્ગ જ અત્યંત બિસ્માર બનતા માર્ગ ઉપર સળિયા ઉપસી આવતા અહીંયાથી પસાર થતા વાહન ચાલકો અને રાહદારીઓ માટે જોખમ સમાન સ્થિતિનું સર્જન થયું છે.
સ્થાનિકોનું માનવામાં આવે તો કતોપોર બજાર તરફ આવતા અનેક રસ્તાઓ ચોમાસાની ઋતુમાં ધોવાઈ ગયા છે તો કેટલાક સ્થળે તો મસમોટા ખાડા પડી જવાના કારણે અહીંયાથી પસાર થવામાં પણ લોકોને તકલીફોનો સામનો કરવો પડી રહ્યો છે તેવામાં નગરપાલિકાનું તંત્ર વહેલી તકે આ વિસ્તારમાં બિસ્માર બનેલા માર્ગોનું રીપેરીંગ કાર્ય હાથધરે તેવી સ્થાનિકો સહિત વેપારી વર્ગ માંગ કરી રહ્યા છે.
હારુન પટેલ : ભરૂચ
મો. : 99252 22744
