– 50 મીટર રાઈફલની 5 ટીમ કેટેગરીમાં ભરૂચના ધનવીર રાઠોડ, વડોદરાના નિખિલ તનવાન અને દીપેન સુથારે ગુજરાતનું વધાર્યું ગૌરવ
નવી દિલ્હી ખાતે હાલ ચાલી રહેલી નેશનલ શૂટિંગ ચેમ્પિયનશિપ રાઇફલ ઇવેન્ટ્સ કોમ્પિટિશનમાં 5 ટીમ કેટેગરીમાં ભરૂચ અને વડોદરાના 3 શૂટર્સે 2 ગોલ્ડ અને 3 સિલ્વર મેળવી ગુજરાતનું ગૌરવ વધાર્યું છે.
નવી દિલ્હી ખાતે 15 નવેમ્બરથી 2 ડિસેમ્બર સુધી નેશનલ શૂટિંગ ચેમ્પિયનશિપ ચાલી રહી છે. જેમાં ગુજરાતમાંથી ભરૂચ અને વડોદરા રાઇફલ શૂટિંગ એસોસિએશનમાંથી શૂટર્સ ધનવીર રાઠોડ, નિખિલ તનવાન અને દીપેન સુથારે ટીમ ઇવેન્ટ્સની 5 કેટેગરીમાં બે ગોલ્ડ અને 3 સિલ્વર અંકે કર્યા છે.
50 મીટરની રાઇફલ શૂટિંગમાં જુનિયર મેન નેશનલ અને સિવિલ ચેમ્પિયનશિપ ટીમમાં બે ગોલ્ડ હાંસલ કર્યા છે. જ્યારે 50 મીટર રાઇફલ પ્રોન નેશનલ, સિવિલિયનની 3 ટીમ કેટેગરીમાં 3 સિલ્વર મેડલ મેળવ્યા છે.
ભરૂચના શૂટર ધનવીર રાઠોડને કોચ મિતલ ગોહિલના માર્ગદર્શન હેઠળ આ સિદ્ધિ હાંસલ કરી છે. જિલ્લા રાઇફલ એસોસિએશનના પ્રમુખ અરૂણસિંહ રણા અને સેક્રેટરી અજય પંચાલે પણ શૂટર્સને જિલ્લા અને ગુજરાતનું નામ રોશન કરવા બદલ અભિનંદન પાઠવ્યા છે.
