ભરૂચ નજીક NH 48 પર આવેલા ઝાડેશ્વર ચોકડી ઓવરબ્રિજ પર ગંભીર અકસ્માત સર્જાયો હતો. ઓવરબ્રિજ પર યાંત્રિક ખામીના કારણે એક કન્ટેનર માર્ગ વચ્ચે ઉભું રહી ગયું હતું. દરમિયાન પાછળથી આવતો ટેમ્પો ધડાકાભેર કન્ટેનર સાથે અથડાતા અકસ્માત સર્જાયો હતો.
અકસ્માત એટલો જોરદાર હતો કે ટેમ્પો ચાલક કેબિનમાં જ ફસાઈ ગયો હતો. ઘટનાની જાણ થતા ભરૂચ ફાયર વિભાગની ટીમ તાત્કાલિક ઘટનાસ્થળે દોડી આવી અને રેસ્ક્યુ ઓપરેશન હાથ ધર્યું હતું. ભારે જહેમત બાદ ફાયર કર્મચારીઓએ કટિંગ સાધનોની મદદથી ચાલકને સહી-સલામત બહાર કાઢવામાં સફળતા મેળવી હતી.
અકસાનમાં ચાલકને પગના ભાગે ઈજા પહોંચતાં તેને તાત્કાલિક સારવાર માટે હોસ્પિટલ ખસેડવામાં આવ્યો હતો. હાલ તેની તબિયત સ્થિર હોવાનું જાણવા મળે છે.
અકસાનના પગલે હાઈવે પર થોડા સમય માટે ટ્રાફિક જામની સ્થિતિ ઊભી થઈ હતી. પોલીસ ટીમે સ્થળ પર પહોંચી ટ્રાફિક વ્યવસ્થા સંભાળી વાહન વ્યવહાર પુનઃ શરૂ કરાવ્યો હતો.
