વાગરા
ભરૂચ જિલ્લાના વાગરા તાલુકાના મુલેર ગામે ભયનું વાતાવરણ ઊભું કરવા માટે રચાયેલા હત્યાના પ્રયાસના કાવતરામાં સંડોવાયેલી ત્રિપુટીમાંથી બે આરોપીઓને વાગરા પોલીસે ઝડપી પાડ્યા છે, જ્યારે મુખ્ય સુત્રધાર હજી સુધી પોલીસ પકડથી દૂર છે. ગામના 126 લોકોએ સહી સાથે રજૂઆત કરી જામીન અરજીનો વિરોધ કરતા આરોપીની આગોતરા જામીન અરજી નામંજુર કરવામાં આવી હતી.
મળતી માહિતી મુજબ, વાગરા પોલીસ મથકે હત્યાના પ્રયાસની ફરિયાદ નોંધાઈ હતી. ઘટનાના દિવસે મુબ્બસીર હનીફ ગઠ પાણીનું ટેન્કર લઈને બસ સ્ટેન્ડ નજીકથી પસાર થતો હતો ત્યારે મકસુદ ઉમરજી પટેલે તેના પિતા હનીફ ગઠ દ્વારા ફોન પર ધમકી આપવામાં આવી હોવાની વાત કરી હતી. આ મુદ્દે મુબ્બસીરે પોતાના પિતાને ફોન કરતા હનીફ ગઠ સુફીયાન ગઠને સાથે લઈને ગાડીમાં સ્થળ પર પહોંચી આવ્યા હતા.
આક્ષેપ મુજબ, હનીફ ગઠે ગાડી આશરે 100ની સ્પીડે દોડાવી મકસુદ પટેલને ટક્કર મારી આશરે 25 ફૂટ દૂર ફેંકી દીધા હતા અને બાદમાં ગાડી રીવર્સ લઈ તેમના પર ચઢાવી હત્યાનો પ્રયાસ કર્યો હતો. ત્યારબાદ ગાડીમાંથી ઉતરી હનીફ ગઠ, સુફીયાન ગઠ અને મુબ્બસીર ગઠે મળીને મકસુદ પટેલને ઢોર માર માર્યો હતો. આસપાસના લોકો દોડી આવતા હુમલાખોરો ફરાર થઈ ગયા હતા.
ઇજાગ્રસ્ત મકસુદ પટેલને સારવાર માટે ખસેડવામાં આવ્યા હતા, જ્યાં તેમને હાથ-પગમાં ફ્રેક્ચર અને માથામાં ગંભીર ઈજાઓ હોવાનું સામે આવ્યું હતું. બનાવને પગલે પોલીસે હત્યાના પ્રયાસનો ગુનો દાખલ કરી આરોપીઓના પગેરા મેળવવા તપાસ શરૂ કરી હતી.
તપાસ દરમ્યાન પોલીસને સફળતા મળતા મુબ્બસીર ગઠ અને સુફીયાન ગઠને સુરતમાંથી ઝડપી પાડવામાં આવ્યા છે, જ્યારે મુખ્ય સુત્રધાર હનીફ ગઠ હજી ફરાર છે. ગામજનોમાં ભયનો માહોલ હોવાના પગલે પોલીસે તાત્કાલિક હનીફ ગઠને ઝડપી પાડી ઘટનાનું રી-કન્સ્ટ્રક્શન કરી કડક કાર્યવાહી કરે તેવી માંગ ઉઠી રહી છે.
