ભરૂચ જિલ્લાના ત્રાલસી ગામ નજીક મુંબઈ-અમદાવાદ બુલેટ ટ્રેન પ્રોજેક્ટ હેઠળ ભારતીય રેલવે ટ્રેક ઉપર 330 મીટર લાંબા સ્ટીલ બ્રિજના 130 મીટર લાંબા સ્પાનનું સફળતાપૂર્વક લોન્ચિંગ પૂર્ણ કરવામાં આવ્યું છે. આ બ્રિજ વેસ્ટર્ન ડેડિકેટેડ ફ્રેટ કોરિડોરના સુરત-વડોદરા વિભાગ વચ્ચે આવેલા DFCC ટ્રેકને પાર કરે છે.
ત્રણ સ્પાન ધરાવતા આ વિશાળ સ્ટીલ બ્રિજમાં 100+130 મીટરનો કન્ટિન્યુઅસ સ્પાન અને 100 મીટરનો સિમ્પલી સપોર્ટેડ સ્પાન સામેલ છે. જેમાંથી 130 મીટર લાંબા સ્પાનનું લોન્ચિંગ 16 મે 2026ના રોજ સફળતાપૂર્વક પૂર્ણ કરવામાં આવ્યું હતું. આશરે 18 મીટર ઊંચાઈ અને 15.5 મીટર પહોળાઈ ધરાવતા આ સ્પાનનું વજન અંદાજે 2900 મેટ્રિક ટન હોવાનું જણાવાયું છે.
આ પહેલાં માર્ચ 2026 દરમિયાન 100 મીટર લાંબા સિમ્પલી સપોર્ટેડ સ્પાનને નિર્માણ સ્થળ પર જ સ્થાપિત કરવામાં આવ્યો હતો, જેનું વજન અંદાજે 1500 મેટ્રિક ટન છે. હવે બાકી રહેલા 100 મીટર લાંબા કન્ટિન્યુઅસ સ્પાનનું પણ ઇન-સીટુ નિર્માણ કરવામાં આવશે.
સંપૂર્ણ બ્રિજ પૂર્ણ થયા બાદ તેની કુલ લંબાઈ 330 મીટર અને કુલ વજન આશરે 6100 મેટ્રિક ટન થશે. ઉમરગામ સ્થિત કાર્બન ફેક્ટરી વર્કશોપમાં તૈયાર કરાયેલા આ સ્ટીલ બ્રિજોને 100 વર્ષની આયુષ્યને ધ્યાનમાં રાખીને ડિઝાઇન કરવામાં આવ્યા છે.
130 મીટર લાંબા આ સ્પાનના નિર્માણમાં આશરે 1.21 લાખથી વધુ ટોર-શિયર પ્રકારના હાઈ સ્ટ્રેન્થ બોલ્ટ, C5 સિસ્ટમ પેઇન્ટિંગ અને મેટાલિક બેરિંગનો ઉપયોગ કરવામાં આવ્યો છે. જમીનથી આશરે 14 મીટરની ઊંચાઈએ અસ્થાયી ટ્રેસ્ટલ્સ ઉપર એસેમ્બલ કરાયેલા આ સ્પાનને બે સેમી-ઓટોમેટિક જેકની મદદથી સ્વચાલિત પદ્ધતિ દ્વારા આગળ ધપાવવામાં આવ્યું હતું. દરેક જેકમાં 250 ટન સુધીની પુશિંગ ક્ષમતા હોવાનું જણાવાયું છે.
ફ્રેટ ટ્રેક ઉપર ટ્રાફિક વ્યવસ્થાને ધ્યાનમાં રાખીને અત્યંત સાવધાનીપૂર્વક તબક્કાવાર રીતે લોન્ચિંગ કામગીરી પૂર્ણ કરવામાં આવી હતી, જેથી માલગાડીઓની અવરજવરમાં ઓછામાં ઓછો વિક્ષેપ સર્જાય.
મુંબઈ-અમદાવાદ બુલેટ ટ્રેન કોરિડોર માટે કુલ 28 સ્ટીલ બ્રિજનું આયોજન કરવામાં આવ્યું છે, જેમાંથી 17 બ્રિજ ગુજરાતમાં નિર્માણ પામી રહ્યા છે અને અત્યાર સુધીમાં 14 બ્રિજ પૂર્ણ થઈ ચૂક્યા છે.
