વાંકલ :: તાલુકા પંચાયતના પ્રમુખ અને ઉપપ્રમુખ પદની વરણીને લઈને રાજકીય ગતિવિધિઓ તેજ બની છે. ભાજપના મેન્ડેટ આધારે માંગરોળ અને ઉમરપાડા તાલુકા પંચાયત માટે સંભવિત ઉમેદવારોના નામોને લઈને સ્થાનિક રાજકીય વર્તુળોમાં ભારે ચર્ચા ચાલી રહી છે.
મળતી માહિતી મુજબ, માંગરોળ તાલુકા પંચાયત પ્રમુખ પદ માટે સંગીતાબેન ગામીતનું નામ આગળ ચાલી રહ્યું છે, જ્યારે ઉપપ્રમુખ પદ માટે રાજુભાઈ પટેલનું નામ સંભવિત માનવામાં આવી રહ્યું છે. બંને નામોને લઈને પક્ષના કાર્યકરોમાં પણ ઉત્સુકતા જોવા મળી રહી છે.
તે જ રીતે ઉમરપાડા તાલુકા પંચાયતના પ્રમુખ પદ માટે સપનાબેન વસાવાનું નામ ચર્ચામાં છે, જ્યારે ઉપપ્રમુખ પદ માટે અમરસીંગ બાંગાભાઈ વસાવાનું નામ સંભવિત ઉમેદવાર તરીકે સામે આવી રહ્યું છે. ખાસ કરીને આદિવાસી વિસ્તાર ધરાવતા ઉમરપાડા તાલુકામાં સ્થાનિક આગેવાનો અને કાર્યકરો વચ્ચે રાજકીય ગરમાવો જોવા મળી રહ્યો છે.
હાલ સુધી પક્ષ તરફથી સત્તાવાર જાહેરાત કરવામાં આવી નથી, પરંતુ પ્રદેશ અને જિલ્લા કક્ષાના મેન્ડેટ આધારે આ નામો લગભગ નક્કી માનવામાં આવી રહ્યા હોવાની ચર્ચા રાજકીય વર્તુળોમાં ચાલી રહી છે. આગામી દિવસોમાં સત્તાવાર જાહેરાત બાદ તાલુકા પંચાયતના નવા સુકાનીઓના નામ પર અંતિમ મહોર લાગશે.
પ્રમુખ અને ઉપપ્રમુખ પદ માટે ચાલી રહેલી અટકળોને લઈને કાર્યકરોમાં ઉત્સાહનો માહોલ જોવા મળી રહ્યો છે, ત્યારે હવે સૌની નજર પક્ષ દ્વારા થનારી સત્તાવાર જાહેરાત પર ટકેલી છે.
