ભરૂચ.
ભરૂચ જિલ્લા પંચાયતના આગામી કાર્યકાળ માટે ભારતીય જનતા પાર્ટીએ પ્રમુખ અને ઉપપ્રમુખ પદના ઉમેદવારોના નામ સત્તાવાર રીતે જાહેર કરતાં જિલ્લા રાજકારણમાં ચહલપહલ જોવા મળી રહી છે. પ્રદેશ મોવડીમંડળના માર્ગદર્શન અને મેન્ડેટ મુજબ પ્રમુખ પદ માટે ડિમ્પલબેન વિક્રમસિંહ રાજ અને ઉપપ્રમુખ પદ માટે અજિત ચિમનભાઈ વસાવાના નામની જાહેરાત કરવામાં આવી છે.
ડિમ્પલબેન વિક્રમસિંહ રાજ રાજપારડી બેઠક નંબર-24 પરથી જિલ્લા પંચાયતના સભ્ય તરીકે ચૂંટાઈ આવ્યા છે અને સંગઠનમાં સક્રિય ભૂમિકા ભજવતા હોવાથી પાર્ટીએ તેમને મહત્વપૂર્ણ જવાબદારી સોંપવાનો નિર્ણય કર્યો હોવાનું માનવામાં આવી રહ્યું છે. બીજી તરફ અજિત ચિમનભાઈ વસાવાને ઉપપ્રમુખ પદ માટે પસંદ કરવામાં આવતા આદિવાસી વિસ્તારના કાર્યકરોમાં પણ ખુશીનો માહોલ જોવા મળી રહ્યો છે.
ભરૂચ જિલ્લા ભાજપ પ્રમુખ પ્રકાશ મોદી એ મીડિયાને માહિતી આપતાં જણાવ્યું હતું કે, પ્રદેશ નેતૃત્વના મેન્ડેટ અનુસાર બંને ઉમેદવારોના ઉમેદવારી ફોર્મ જિલ્લા વિકાસ અધિકારી (DDO) યોગેશ કાપસે સમક્ષ સત્તાવાર રીતે રજૂ કરવામાં આવ્યા છે. તેમણે જણાવ્યું હતું કે, જિલ્લા પંચાયત પ્રમુખ અને ઉપપ્રમુખ પદ માટેની ચૂંટણી પ્રક્રિયા આવતીકાલે પૂર્ણ થવાની છે અને પક્ષના તમામ ચૂંટાયેલા સભ્યોમાં ઉત્સાહનો માહોલ છે.
ભાજપ પાસે હાલમાં ભરૂચ જિલ્લા પંચાયતમાં સ્પષ્ટ બહુમતી હોવાથી બંને ઉમેદવારો બિનહરીફ ચૂંટાઈ આવે અથવા જંગી બહુમતીથી વિજય મેળવે તેવી રાજકીય વર્તુળોમાં ચર્ચા ચાલી રહી છે. જિલ્લા પંચાયતના નવા સુકાનીઓ તરીકે ડિમ્પલબેન રાજ અને અજિત વસાવા વિકાસલક્ષી કાર્યોને વધુ ગતિ આપશે તેવી પણ પક્ષના કાર્યકરો અને સમર્થકો આશા વ્યક્ત કરી રહ્યા છે.
જાહેરાત બાદ ભાજપ કાર્યકરોમાં આનંદની લાગણી ફેલાઈ ગઈ હતી અને અનેક કાર્યકરોએ નવા નેતૃત્વને અભિનંદન પાઠવ્યા હતા. હવે આવતીકાલે યોજાનારી સત્તાવાર પ્રક્રિયા બાદ ભરૂચ જિલ્લા પંચાયતને નવા પ્રમુખ અને ઉપપ્રમુખ મળી જશે.
