ઉમરપાડા તાલુકામાં વિધિવત ચોમાસાની શરૂઆત પહેલા જ મેઘરાજાએ તોફાની અંદાજમાં આગમન કરતાં સમગ્ર પંથકમાં ભારે વરસાદી માહોલ સર્જાયો હતો. મોડી રાત્રે અચાનક વાતાવરણમાં પલટો આવતા ગાજવીજ અને પ્રચંડ વીજળીના કડાકા-ભડાકા સાથે ધોધમાર વરસાદ વરસ્યો હતો.
Advertisement
ખાસ કરીને મધ્યરાત્રિના સમયે આકાશમાં સતત ચમકતી વીજળીના કારણે સમગ્ર વિસ્તાર ધોળા દિવસ જેવો પ્રકાશિત થઈ ગયો હતો. ભારે ગાજવીજ અને વીજળીના અવાજોથી લોકોમાં ભયનો માહોલ સર્જાયો હતો. સુરત જિલ્લાનું ચેરાપુંજી ગણાતા ઉમરપાડામાં વરસેલા વરસાદ અને આકાશી વીજળીના દ્રશ્યોના વીડિયો પણ સોશિયલ મીડિયામાં વાયરલ થયા છે.
ચોમાસા પહેલા જ મેઘરાજાના આ રૌદ્ર સ્વરૂપે લોકોને ચોંકાવી દીધા છે. હવામાનમાં આવેલા અચાનક બદલાવને કારણે આગામી દિવસોમાં વધુ વરસાદી માહોલ રહેવાની શક્યતાઓ વ્યક્ત કરવામાં આવી રહી છે.
