વાંકલ :
હવામાન વિભાગની આગાહી વચ્ચે સુરત જિલ્લામાં આખરે મેઘરાજાએ જોરદાર એન્ટ્રી કરી છે. મોડી રાતથી શરૂ થયેલા વરસાદે સમગ્ર જિલ્લામાં સાર્વત્રિક હાજરી નોંધાવી છે. લાંબી રાહ બાદ વરસેલા વરસાદથી વાતાવરણમાં નોંધપાત્ર ઠંડક પ્રસરી ગઈ છે, જ્યારે છેલ્લા ઘણા દિવસોથી અસહ્ય ગરમી અને ઉકળાટથી પરેશાન લોકો તથા ખેડૂતોને મોટી રાહત મળી છે.
જિલ્લાના વિવિધ તાલુકાઓમાં સારા વરસાદની નોંધ થઈ છે. પ્રાપ્ત વિગતો મુજબ માંગરોળ તાલુકામાં 30 મીમી અને ઉમરપાડા તાલુકામાં 10 મીમી વરસાદ નોંધાયો છે. વાંકલ સહિત આસપાસના ગ્રામ્ય વિસ્તારોમાં પણ મેઘરાજાએ મન મૂકીને વરસતા માર્ગો પર પાણી ફરી વળ્યા હતા અને વાતાવરણ સંપૂર્ણપણે બદલાઈ ગયું હતું.
છેલ્લા એક અઠવાડિયાથી જિલ્લામાં તાપમાનનો પારો સતત ઊંચો રહેતા લોકો ગરમી અને ભેજના કારણે ભારે હાલાકીનો સામનો કરી રહ્યા હતા. દિવસ દરમિયાન ઉકળાટ એટલો વધી ગયો હતો કે જનજીવન પ્રભાવિત બન્યું હતું. જોકે મોડી રાતથી શરૂ થયેલા વરસાદે ગરમીનું જોર તોડી નાંખ્યું છે અને સમગ્ર જિલ્લામાં ઠંડકભર્યું તથા આહલાદક વાતાવરણ સર્જાયું છે.
વરસાદના આગમનથી સૌથી વધુ ખુશી ખેડૂતોમાં જોવા મળી રહી છે. સમયસર અને વાવણીલાયક વરસાદ વરસતાં ખેડૂતોના ચહેરા પર ખુશીની લહેર ફરી વળી છે. સુરત જિલ્લાના ગ્રામ્ય વિસ્તારોમાં ડાંગર, શેરડી તેમજ વિવિધ શાકભાજીના પાકનું મોટા પાયે વાવેતર કરવામાં આવે છે. કૃષિ નિષ્ણાતોના મતે આ વરસાદ ખેડૂતો માટે આશીર્વાદરૂપ સાબિત થશે અને આગામી ખેતીની સિઝન માટે અનુકૂળ પરિસ્થિતિ ઊભી કરશે.
વરસાદ શરૂ થતાં જ ગ્રામ્ય વિસ્તારોમાં ખેડૂતો ખેતરોમાં ઉતરી પડ્યા છે અને જોરશોરથી વાવણીની કામગીરી શરૂ કરી દીધી છે. અનેક સ્થળોએ ટ્રેક્ટર અને અન્ય કૃષિ સાધનો સાથે ખેતીની તૈયારીઓ તેજ બની ગઈ છે. જો આગામી દિવસોમાં પણ હવામાન અનુકૂળ રહેશે તો જિલ્લાના કૃષિ ઉત્પાદનને નોંધપાત્ર ફાયદો થવાની સંભાવના વ્યક્ત કરવામાં આવી રહી છે.
હવામાન વિભાગે આગામી દિવસોમાં પણ સુરત જિલ્લા સહિત દક્ષિણ ગુજરાતના અનેક વિસ્તારોમાં હળવાથી મધ્યમ અને કેટલાક સ્થળોએ ભારે વરસાદની શક્યતા વ્યક્ત કરી છે. જેના કારણે ખેડૂતોમાં આશાનું નવું કિરણ જાગ્યું છે, જ્યારે સામાન્ય નાગરિકોને પણ ગરમીમાંથી રાહત મળતાં ખુશીનો માહોલ જોવા મળી રહ્યો છે.
