ભરૂચ:
શહેરમાં સ્વચ્છતા અને પર્યાવરણ સંરક્ષણ અંગે જનજાગૃતિ ફેલાવવાના હેતુથી માતરીયા તળાવ ખાતે **‘પ્લોગ રન’**નું આયોજન કરવામાં આવ્યું હતું. ભરૂચ રનિંગ ક્લબ, જેસીઆઈ ભરૂચ, ભરૂચ નગરપાલિકા અને મોમ્સ ઓફ ભરૂચના સંયુક્ત ઉપક્રમે યોજાયેલી આ પ્લોગ રન રોકવુલ ભરૂચ હાફ મેરેથોનના પ્રમોશનલ રનનો ભાગ હતી.
આ અભિયાનમાં આશરે 90 જેટલા લોકો જોડાયા હતા. સહભાગીઓએ માતરીયા તળાવથી શક્તિનાથ સુધી દોડતા અને ચાલતા રસ્તામાં પડેલો સિંગલ યુઝ પ્લાસ્ટિક તેમજ અન્ય કચરો એકત્ર કરી સ્વચ્છતાનો સંદેશ આપ્યો હતો. આ અભિયાનમાં માતરીયા સિનિયર સિટીઝન ક્લબના સભ્યોએ પણ ઉત્સાહપૂર્વક ભાગ લીધો હતો.
પ્લોગ રન દરમિયાન નાગરિકોને સિંગલ યુઝ પ્લાસ્ટિકનો ઉપયોગ ટાળવા અને જાહેર સ્થળોએ કચરો ન ફેંકવા અંગે જાગૃત કરવામાં આવ્યા હતા. આયોજકોએ જણાવ્યું હતું કે ભરૂચને સ્વચ્છ, સુંદર અને પ્લાસ્ટિકમુક્ત બનાવવા માટે માત્ર તંત્ર જ નહીં, પરંતુ નાગરિકોની સક્રિય ભાગીદારી પણ જરૂરી છે.
કાર્યક્રમના અંતે ઉપસ્થિત તમામ સભ્યોએ સ્વચ્છતા જાળવવા તેમજ પર્યાવરણનું રક્ષણ કરવા માટે સંકલ્પ લીધો હતો. શહેરમાં સ્વચ્છતા પ્રત્યે જાગૃતિ વધારવા અને વધુને વધુ લોકોને આવા અભિયાનો સાથે જોડવા માટે પ્લોગ રન જેવા કાર્યક્રમો અસરકારક સાબિત થઈ રહ્યા છે.
