ભરૂચ :
ભરૂચ પોલીસ હેડક્વાર્ટર ખાતે પોલીસ વિભાગ દ્વારા શસ્ત્ર પ્રદર્શન, અશ્વ શો અને ડોગ શોનું આયોજન કરવામાં આવ્યું છે. પોલીસની કામગીરી, સુરક્ષા વ્યવસ્થા અને કાયદો-વ્યવસ્થા જાળવવામાં પોલીસ દ્વારા ઉપયોગમાં લેવાતાં વિવિધ સાધનો વિશે સામાન્ય નાગરિકોને જાણકારી મળી રહે તેવા હેતુથી આ વિશેષ પ્રદર્શન યોજાયું છે.
આ ત્રણ દિવસીય પ્રદર્શનમાં નાગરિકોને પોલીસ દ્વારા ઉપયોગમાં લેવાતાં વિવિધ પ્રકારનાં શસ્ત્રો નિહાળવાની તક મળશે. આ ઉપરાંત પોલીસના અશ્વદળ દ્વારા અશ્વ શો અને તાલીમબદ્ધ ડોગ સ્ક્વોડ દ્વારા ડોગ શો રજૂ કરવામાં આવશે. તેના માધ્યમથી પોલીસની તાલીમ, કાર્યપદ્ધતિ અને ગુનાની તપાસમાં અશ્વદળ તથા ડોગ સ્ક્વોડની ઉપયોગિતા વિશે લોકોને જાણકારી મળશે.
પોલીસ અને નાગરિકો વચ્ચે વધુ સારો સંવાદ સ્થાપિત થાય તેમજ પોલીસની કામગીરી અંગે લોકોમાં જાગૃતિ વધે તે દિશામાં આ આયોજન મહત્વપૂર્ણ બની રહેશે. ત્રણ દિવસ દરમિયાન યોજાનારા આ પ્રદર્શનથી નાગરિકોને પોલીસની કામગીરીને નજીકથી જાણવાનો અવસર મળશે.
