આમોદ :
ભરૂચ જિલ્લાના આમોદ તાલુકાના સરભાણ ગામે સરકારી ગૌચરની જમીનમાંથી કથિત ગેરકાયદે માટી ખોદકામ અને વેચાણના મામલે ફરી તપાસની માંગ ઉઠી છે. આ મામલે મૂળ ફરિયાદી બિપીન સોમાભાઈ પટેલે ભરૂચની એડિશનલ સેશન્સ કોર્ટમાં અરજી કરીને સમગ્ર પ્રકરણની નિષ્પક્ષ અને તલસ્પર્શી તપાસ કરવાની માંગ કરી છે.
મળતી માહિતી મુજબ, સરભાણ ગામના સરદાર પોળ વિસ્તારમાં રહેતા બિપીન સોમા પટેલે 13 એપ્રિલ, 2021ના રોજ જિલ્લા વિકાસ અધિકારીને લેખિત ફરિયાદ કરી હતી. ફરિયાદમાં આક્ષેપ કરવામાં આવ્યો હતો કે ગામની સરકારી ગૌચરની જમીનમાંથી ગ્રામ પંચાયતની બોડી તથા કોન્ટ્રાક્ટર ઉત્તમ છોટુ પટેલ દ્વારા કથિત રીતે બિનઅધિકૃત માટી ખોદકામ કરી તેનું વેચાણ કરવામાં આવ્યું હતું. આ ઉપરાંત પંચાયતની મિલકતને નુકસાન પહોંચાડવા અને સરકારને રોયલ્ટીની આવકમાં નુકસાન થવા સાથે ભ્રષ્ટાચાર આચરવામાં આવ્યો હોવાના આક્ષેપ પણ કરવામાં આવ્યા હતા.
આ મામલે જવાબદાર અધિકારીઓ, પદાધિકારીઓ અને કોન્ટ્રાક્ટર સામે કાર્યવાહી કરવાની માંગ કરવામાં આવી હતી. ત્યારબાદ તત્કાલીન તાલુકા વિકાસ અધિકારી (ટીડીઓ) દ્વારા ગ્રામ પંચાયત સાથે સંકળાયેલા અજાણ્યા વ્યક્તિઓ સહિતના લોકો સામે પોલીસ ફરિયાદ નોંધાવવામાં આવી હતી. ફરિયાદમાં સ્થળ પરથી અંદાજે રૂ. 8 કરોડની કિંમતની માટીની ચોરી થઈ હોવાનો ઉલ્લેખ કરવામાં આવ્યો હોવાનું જણાવાયું છે.
જોકે, આ સમગ્ર પ્રકરણમાં તપાસ દરમિયાન અપેક્ષિત કાર્યવાહી કરવામાં આવી ન હોવાનો આક્ષેપ મૂળ ફરિયાદી બિપીન સોમાભાઈ પટેલે કર્યો છે. કોર્ટમાં કરેલી અરજીમાં તેમણે જણાવ્યું છે કે કથિત ગેરકાયદે ખોદકામના મામલે મુખ્ય આરોપી ગણાવતા કોન્ટ્રાક્ટર ઉત્તમ છોટુ પટેલને પોલીસ ફરિયાદમાં આરોપી તરીકે દર્શાવવામાં આવ્યા નથી.
અરજીમાં તત્કાલીન ટીડીઓ, મામલતદાર, નાયબ કલેક્ટર, ભૂસ્તરશાસ્ત્ર અને ખાણ-ખનીજ વિભાગના અધિકારીઓ, તલાટી-કમ-મંત્રી, તત્કાલીન સરપંચ તુષાર જસાભાઈ પટેલ, ઉપસરપંચ રોનક પટેલ તેમજ તે સમયની ગ્રામ પંચાયતની બોડીના સભ્યોની ભૂમિકાની તપાસ કરવાની પણ માંગ કરવામાં આવી છે. ફરિયાદીને શંકા છે કે આ પ્રકરણમાં સંબંધિત કેટલાક અધિકારીઓ અને અન્ય વ્યક્તિઓની ભૂમિકા હોવા છતાં તેમની સામે કાર્યવાહી કરવામાં આવી નથી.
મૂળ ફરિયાદીએ આક્ષેપ કર્યો છે કે તપાસના નામે માત્ર પોલીસ ફરિયાદ નોંધાવી સંતોષ માની લેવામાં આવ્યો છે અને સમગ્ર મામલાને દબાવી દેવામાં આવ્યો છે. આથી, ગૌચરની જમીનમાંથી કથિત માટી ખોદકામ અને વેચાણના પ્રકરણમાં કોણ-કોણ સંડોવાયેલું છે તેની નિષ્પક્ષ તપાસ કરી જવાબદારો સામે કાયદેસરની કાર્યવાહી કરવામાં આવે તેવી માંગ કોર્ટ સમક્ષ કરવામાં આવી છે.
નોંધનીય છે કે આ સમગ્ર મામલે રજૂ કરાયેલા આક્ષેપો અંગે સંબંધિત પક્ષોની પ્રતિક્રિયા અને કોર્ટની આગળની કાર્યવાહી અંગેની વિગતો ઉપલબ્ધ નથી.
