સુરતનાં ભરચક અવરજવરવાળા વરાછા વિસ્તારમાં ટ્રાફિક નિયમનની કામગીરી બજાવતા ટીઆરબીના કર્મચારીઓ વાહનો અટકાવવા જતા એક ઓટો રીક્ષા પલ્ટી જતા અફરાતફરીનો માહોલ સર્જાયો હતો.

સુરતના વરાછા વિસ્તારમાં આજરોજ ટ્રાફિક કર્મીઓ દ્વારા વાહનોને અટકાવવા જતા પેસેન્જર ભરેલી એક ઓટો રીક્ષાના ચાલકે સ્ટિયરિંગ ઉપરનો કાબુ ગુમાવી દેતા રીક્ષા પલ્ટી ગઈ હતી. આ ઘટનામાં ત્રણ પેસેન્જરોને ઈજાઓ પહોંચી હતી.જોકે ઓટો રીક્ષા ચાલક સહિત રિક્ષામાં સવાર મુસાફરો ભારે રોષે ભરાયા હતા અને ટીઆરબી ના કર્મચારીઓનો બરાબર ઉધડો લીઘો હતો. ભારે બોલાચાલી ઉગ્ર બનતા એક તબકકે ટીઆરબી અને વાહન ચાલકો વચ્ચે ઝપાઝપીના દ્રશ્યો સર્જાયા હતા. લાંબા સમય સુધી બોલાચાલીને અંતે ટ્રાફિક પોલીસના જમાદાર આવી જતા સમજાવટ બાદ મામલો ઠંડો પડયો હતો. અન્ય સ્થાનિક વાહન ચાલકોએ ટીઆરબીની કામગીરી સામે રોષ ઠાલવ્યો હતો.