ભરૂચનાં સેવાશ્રમ રોડ પર આવેલા સ્ટેચ્યુ પાર્ક નજીક અકસ્માત થયો.

ભરૂચનાં સેવાશ્રમ રોડ પર આવેલા સ્ટેચ્યુ પાર્ક નજીક બાઈક અને ઇકો કાર વચ્ચે થયેલા અકસ્માતની ઘટના સીસીટીવી કેમેરામાં કેદ થઇ ગઇ છે. ધો.11 નો વિદ્યાર્થી મિત્રને લેવા માટે બાઈક પર જઇ રહ્યો હતો ત્યારે રિક્ષાને ઓવરટેક કરવા જતાં ઇકો કાર સાથે અથડાયો હતો. ઇકો કાર સાથે બાઈક અથડાતાં યુવક હવામાં ફંગોળાયો હતો. ગુરુવારે બનેલી આ ઘટનાના સીસીટીવી સામે આવ્યા છે.

બનાવની મળતી માહિતી અનુસાર, ભરૂચના લિંક રોડ પર આવેલા યોગેશ્વર નગરમાં રહેતો અને ધો. 11 સાયસન્સમાં અભ્યાસ કરતો વેદાંત જગલાવાલા ગુરુવારે સવારે 8 વાગ્યાની આસપાસ ભરૂચના સેવાશ્રમ રોડ પરથી પોતાના મિત્રને લેવા બાઈક પર જઈ રહ્યો હતો. તે દરમિયાન સ્ટેચ્યુ પાર્ક નજીક સામેથી આવતી ઇકો કાર સાથે ધડાકાભેર અથડાતાં વેદાંત હવામાં ફંગોળાયો હતો અને માર્ગની સાઈડ પર પટકાતાં તેને ગંભીર ઈજાઓ પહોંચી હતી. વેદાંતને સારવાર અર્થે નજીક હોસ્પિટલમાં ખસેડવામાં આવ્યો હતો.