સુરતનાં ખટોદરા વિસ્તારમાં આવેલી થર્મોકોલની ઓફીસમાં લાગી અચાનક આગ : ફાયર વિભાગ દોડતું થયું.

સુરત શહેરમાં અવારનવાર આગ લાગવાની હોનારત બનતી રહેતી હોય છે, તેમ આજરોજ સુરત શહેરના ખટોદરા વિસ્તારમાં આવેલી શેપર એન્જિનિયરિંગ થર્મોકોલની ઓફીસમાં અચાનક આગ લાગી જતા ફાયર વિભાગ દોડતું થઈ ગયું હતું. ત્રણ ફાયર સ્ટેશનની ગાડીઓ તાત્કાલિક જ ઘટના સ્થળે દોડી ગઈ હતી, ઓફિસનો કાચ તોડી સેફ્ટી સાથે અંદર ઘૂસ્યા હતા. ભારે ધુમાડા વચ્ચે આગને કાબૂમાં લેવામાં આવી હતી.

ફાયર વિભાગે જણાવ્યું હતું કે, લાકડાનાં બારી-બારણા બનાવતા મનહરભાઇની ઓફિસમાં આગ લાગતા ભાગદોડ મચી ગઇ હતી. શોર્ટ સર્કિટથી આગ લાગી હોય એવું પ્રાથમિક તારણ બહાર આવ્યું છે. આ દુર્ઘટનામાં ઓફિસનાં ફોલ સિલીંગ, કોમ્પ્યુટર, ફર્નિચર, પોલિશિંગ મશીન વગેરે આગમાં બળીને ખાખ થઈ જતા લાખોનું નુકસાન થયું છે. ફાયર ઓફિસરે જણાવ્યું હતું કે, શોર્ટ સર્કિટના કારણે આગ લાગી હતી. જોકે, હાલ કન્ટ્રોલમાં છે. કોઈ જાનહાનિ નોંધાય નથી. પરંતુ લાખોનું નુકસાન થયું હોય એમ તારણ કાઢવામાં આવ્યું છે.