સતત બે દિવસ વરસેલા કમોસમી વરસાદને લઇને ઝઘડીયા તાલુકા સહિત સમગ્ર ભરૂચ જિલ્લામાં ચોમાસુ શરુ થયુ હોય એવુ વાતાવરણ દેખાતુ હતું. કમોસમી વરસાદ સતત બે દિવસ વરસતા તેની અસર સ્પસ્ટપણે ઝઘડીયા તાલુકાના જનજીવન પર દેખાતી હતી. વરસાદી માહોલ વચ્ચે ફળી વળેલા શીત લહેરના મોજાથી સમગ્ર તાલુકામાં જનજીવન અસ્તવ્યસ્ત બન્યુ હતું. વાતાવરણમાં ઠંડીનું પ્રમાણ વધતા લોકો ખાસ કરીને ઘરોમાં બેસી રહેલા જણાતા હતા. સતત બે દિવસના વરસાદી માહોલ બાદ આજે ત્રીજા દિવસે તડકો નીકળીને ઉઘાડ નીકળતા તાલુકામાં જનજીવન પૂર્વવત થયુ હતું. ચોવીસ કલાક વાહનોની રફતારથી જીવંત રહેતા તાલુકામાંથી પસાર થતા અંકલેશ્વર રાજપિપલા ધોરીમાર્ગ પર બે દિવસના વરસાદી માહોલને લઇને વાહનોની સંખ્યા નહિવત જણાતી હતી, ત્યારે આજે નીકળેલા ઉઘાડ બાદ આ ધોરીમાર્ગ વાહનોની આવનજાવનથી પુનઃ ધબકતો થયો હતો. તાલુકામાં બે દિવસના વરસાદી માહોલ બાદ આજે ત્રીજા દિવસે ઉઘાડ નીકળતા તાલુકાના બજારોમાં પણ ઘરાકીનો માહોલ ખુલવાની આશા વેપારીવર્ગમાં જણાય છે.
ગુલામહુશેન ખત્રી રાજપારડી જિ.ભરૂચ
