દિનેશભાઇ અડવાણી
ભરૂચ થી સુરત તરફના નેશનલ હાઇવે ઉપર ગત મોડી રાતે બાઇક પર ત્રણ સવારી જતા યુવાનોને પુર ઝડપે આવતા એક ટેમ્પોએ અડફેટે લઈ ટક્કર મારતા સર્જાયેલ અકસ્માતમાં એક યુવાનનું ગંભીર ઇજાઓના પગલે ઘટના સ્થળે જ કરૂણ મોત નીપજ્યું હતું. જ્યારે બાઇક ઉપર સવાર અન્ય બે યુવાનોને ઇજાઓ પહોંચતા તેમને સારવાર અર્થે ખસેડાયા હતા.
તા.૨૭/૦૩/૨૦૧૯ની રાતે નેશનલ હાઇવે નં.૪૮ ઉપર સુરત થી ભરૂચ જવાના રોડ ઉપર પોતાની બાઇક નં.GJ-16-BA-6073 લઈને લક્ષમણ રણજીત વસાવા,ભદ્રેશ કાલીદાસ વસાવા અને વનમાળ રતીલાલ વસાવા ઉમરગામ જવા નીકળ્યા હતા.દરમિયાન સુરત થી ભરૂચ જવાના રોડ ઉપર નેશનલ પેટ્રોલિયમ નજીક થી પસાર થતા હતા ત્યારે અચાનક પુરઝડપે આવતા એક આઇસર ટેમ્પોએ તેમની બાઇકને અડફેટે લઈ ટક્કર મારી હતી. આ અકસ્માતમાં બાઇક ઉપર સવાર ત્રણેવ યુવાનો રોડ ઉપર પટકાયા હતા.જેમાં બાઇક ચાલક લક્ષમણ વસાવાને માથામાં ગંભીર ઇજાઓ પહોંચતા તેનું ઘટના સ્થળે જ કરૂણ મોત નીપજ્યું હતું. જ્યારે બાઇક પર સવાર અન્ય બે યુવાનોને નાની મોટી ઇજાઓ પહોંચતા તેમને સારવાર અર્થે ખસેડાયા હતા.ઘટનાની જાણ અંકલેશ્વર શહેર પોલીસને થતાં પોલીસે ઘટના સ્થળે પહોંચી અકસ્માતમાં મરનાર યુવાનની લાશને પી.એમ. અર્થે ખસેડી ફરાર ટેમ્પો ચાલકની તપાસ હાથ ધરી છે.
