અંકલેશ્વર : ગુજરાત પોલીસ કર્મીઓનાં ગ્રેડ પે વધારવાની માંગ સાથે રાજપૂત કરણી સેનાએ આવેદન પાઠવ્યું.

ભરૂચ જિલ્લાના અંકલેશ્વર તાલુકાની રાજપૂત કરણી સેના દ્વારા ગુજરાત પોલીસ કર્મચારીઓને ગ્રેડ પે સહિતની સુવિધાઓનો લાભ મળી રહે તે માટે મુખ્યમંત્રી, ભરૂચ કલેકટર અને ગૃહ રાજયમંત્રીને સંબોધીને અંકલેશ્વરનાં મામલતદારને આવેદનપત્ર આપી રજૂઆત કરવામાં આવી હતી.

રાજપૂત કરણી સેનાની આ લેખિત રજૂઆતમાં જણાવ્યા અનુસાર ગુજરાતનાં પોલીસ કર્મચારીઓને હાલના સમયમાં મળતું ગ્રેડ પે અન્ય રાજયોની સરખામણીમાં ઓછું મળે છે જેમાં સુધારો કરી ગુજરાતનાં તમામ પોલીસ કર્મચારીઓને ગ્રેડ પે ની રકમમાં વધારો કરવો જોઈએ તેમજ રાજ્યમાં તમામ પોલીસ કર્મચારીઓની ફરજનો સમય નક્કી કરવામાં આવે તેવી રાજપૂત કરણી સેનાની સરકાર સમક્ષ માંગણી છે. આ લેખિતપત્ર પાઠવતી વખતે અંકલેશ્વર રાજપૂત કરણી સેનાનાં પ્રમુખ અજિતસિંગ રાજાવત, પ્રભારી પ્રવિણસિંહ પરમાર સહિતના આગેવાનો ઉપસ્થિત રહ્યા હતા.

મુકેશ વસાવા : અંકલેશ્વર