અંકલેશ્વરના પ્રતિન ઓવર બ્રિજ નીચે ગત રાત્રીના નેશનલ હાઇવે નંબર 48 પરથી એક બાઈક પર પસાર થતાં સાઢુ ભાઈઓને એક તેજ રફતાર આવતા કાર ચાલકે અડફેટમાં લીધા હતાં. જેમાં એક ઇસમનું ઘટના સ્થળ પર મોત નીપજ્યું હતું. જ્યારે બીજા ઇસમનું સારવાર દરમિયાન મોત નીપજ્યું હતું. અકસ્માતને પગલે કાર ચાલક સ્થળ પરથી પલાયન થઈ ગયો હતો. આ મામલે અંકલેશ્વર GIDC પોલીસે ગુનો નોંધી તપાસ હાથ ધરી છે.
નેત્રંગ તાલુકાના કેલ્વીકુવા ગામના વડ ફળિયામાં રહેતા ચીમન સોમાભાઈ વસાવા અને તેમના મનીષ માધુભાઈ વસાવા બંનેય સંબંધમાં સાઢુ ભાઈઓ થાય છે. તેઓ ગત રાત્રીના મંગળવારના રોજ 10 વાગ્યાના અરસામાં પોતાની મોટર સાયકલ લઈને અંકલેશ્વરના પ્રતિન ઓવર બ્રિજ નીચે નેશનલ હાઈવે નંબર 48 ઉપરથી સુરત તરફ જઈ રહ્યા હતાં. આ સમય દરમિયાન એક હુંડાઈ કારના ચાલકે ફૂલ ઝડપે અને ગફ્લત ભરી રીતે હંકારી લાવીને મોટર સાયકલ પરથી જતા બંનેય બાઈક સવારને અડફેટમાં લેતા અકસ્માત સર્જાયો હતો. અકસ્માતના પગલે આજુબાજુથી પસાર થતાં વાહન ચાલકો દોડી આવ્યા હતા.
અકસ્માત એટલો ભયંકર હતો કે, બાઈક કારની આગળના બંપ્પર તોડીને અંદર ઘૂસી ગઈ હતી. અકસ્માતમાં બાઈક ચાલક બંને સાઢુ ભાઈઓ રોડ ઉપર પટકાતા એક ઈસમ ચીમન વસાવાને શરીર ઉપર ગંભીર ઇજાઓ પહોંચતા તેમનું ઘટના સ્થળ પર જ મોત નીપજ્યું હતું. જ્યારે મનીષ વસાવાને પગમાં અને માથામાં ગંભીર ઇજાઓ પહોંચતા તેઓને 108 એમ્બ્યુલન્સ મારફતે સારવાર અર્થે ભરૂચ સિવિલ હોસ્પિટલમાં ખસેડવામાં આવ્યા હતાં. જ્યાં તેમનું સારવાર દરમિયાન મોત નીપજ્યું હતું. જોકે અકસ્માતના કારણે ગભરાઈ ગયેલો કાર ચાલક સ્થળ કાર મૂકીને ફરાર થઇ ગયો હતો. બનાવની જાણ થતાં જ અંકલેશ્વર GIDC પોલીસ મથકનો પોલીસ સ્ટાફ સ્થળ પર દોડી આવી અકસ્માત મોતનો ગુનો નોંધીને ફરાર કાર ચાલકને ઝડપી પાડવાની કવાયાત હાથ ધરી છે.
