અંકલેશ્વર ખાતે ગત તારીખ 10 ફેબ્રુઆરી 2023 ના રોજ ભરુચિ નાકા પાસે આવેલ રમણ મુરજીની વાડી નજીક ના SBI બેન્કના ATM ને તોડી તેમાંથી ચોરી કરવાનો નિષ્ફળ પ્રયાસ કરવામાં આવ્યો હોવાની પોલીસ ચોપડે ફરિયાદ નોંધાઈ હતી, જે બાદ મામલે પોલીસે ટેક્નિકલ સર્વેલન્સની મદદથી જુદી જુદી ટિમો બનાવી સીસીટીવી ફૂટેજ કબ્જે કરી તપાસના ધમધમાટ શરૂ કર્યા હતા.
પોલીસની તપાસ દરમ્યાન બાતમી મળી હતી કે સમગ્ર ઘટનાને અંજામ આપનાર ઈસમ અંકલેશ્વરના નવીદીવી ગ્રાઉન્ડ ખાતે જોવા મળેલ છે, જે બાદ પોલીસે તાત્કાલિક સ્થળ પર જઈ શંકાસ્પદ ઈસમ મન ઉર્ફે ગોલુ તુકારામ વેડે કર ને પકડી પાડી અંકલેશ્વર એ ડિવિઝન પોલીસ મથકે લાવી તેની ઊંડાણપૂર્વક તપાસ હાથધરી હતી જે બાદ તેણે ઘટનાને અંજામ આપ્યો હોવાની કબૂલાત કરી હતી.
મન ઉર્ફે ગોલુ એ જણાવ્યું હતું કે તે કંઈ કામધંધો કરતો ન હોય અને સોમનાથ તથા જૂનાગઢ ફરવા માટે જવુ હોય તેને પૈસાની જરૂરિયાત હોય જેથી તેણે SBI બેન્કના ATM ને તોડી તેમાંથી પૈસા ચોરી કરવાનો પ્રયાસ કર્યો હતો જેમાં તે નિષ્ફળ જતા નાસી છૂટ્યો હતો.
