ભરૂચ: ભરૂચના લિંક રોડ સ્થિત શ્રી ભૃગુપુર મોઢ મોદી સમાજના કુળદેવી શ્રી મોઢેશ્વરી માતાના સાનિધ્યમાં આગામી તા. ૩૧/૦૧/૨૦૨૬, શનિવાર (મહા સુદ તેરસ) ના રોજ ૨૬મો પાટોત્સવ અત્યંત હર્ષોલ્લાસ સાથે ઉજવવામાં આવશે. આ મહોત્સવની પૂર્વસંધ્યાએ તા. ૩૦ જાન્યુઆરીના રોજ રાત્રે ૯ થી ૧૧ કલાકે શ્રી મોઢેશ્વરી ભવન ખાતે ‘આનંદનો ગરબો’ યોજાશે, જે ભક્તિમય માહોલની શરૂઆત કરશે.
પાટોત્સવના મુખ્ય દિવસે સવારે ૭:૩૦ કલાકે માતાજીની આરતી અને કેક કટિંગ સાથે ઉજવણીનો પ્રારંભ થશે. બપોરે ૩:૩૦ કલાકે હિતેશનગર મંદિરથી એક ભવ્ય શોભાયાત્રા પ્રસ્થાન કરશે, જેમાં શિનોરની પ્રખ્યાત બેન્ડ પાર્ટી આકર્ષણનું કેન્દ્ર બનશે. આ યાત્રા સિવિલ રોડ અને શક્તિનાથ થઈ લિંક રોડ પર આવેલા શ્રી નારાયણ બાપુના આશ્રમે પહોંચશે. સાંજ પડતા જ ધાર્મિક વિધિઓનો દોર શરૂ થશે, જેમાં ૪:૩૦ કલાકે હવન અને ૬:૩૦ કલાકે શ્રીફળ હોમવામાં આવશે. સાંજે ૭:૦૦ કલાકે દિવ્ય મહાઆરતી બાદ ૭:૩૦ કલાકે મહાપ્રસાદીનું આયોજન કરવામાં આવ્યું છે. ભરૂચની ધર્મપ્રેમી જનતાને આ ભક્તિસભર અવસરમાં સહભાગી થવા આયોજકો દ્વારા ભાવભર્યું આમંત્રણ પાઠવવામાં આવ્યું છે.
