વડોદરા શહેરમાં તા. 1 ફેબ્રુઆરીના રોજ આયોજિત ભવ્ય મેરેથોનમાં ભરૂચની સામાજિક સંસ્થા ‘મોમ્સ ઓફ ભરૂચ’ની ઉત્સાહભરી અને નોંધપાત્ર ભાગીદારી જોવા મળી હતી. આ મેરેથોન માટે ‘મોમ્સ ઓફ ભરૂચ’ એનજીઓને વિશેષ આમંત્રણ આપવામાં આવ્યું હતું, જે સંસ્થાની સામાજિક પ્રવૃત્તિઓ માટે મળતી ઓળખને દર્શાવે છે.
મેરેથોનમાં ભરૂચથી કુલ 135 દોડવીરોએ ‘મોમ્સ ઓફ ભરૂચ’ના બેનર હેઠળ ભાગ લીધો હતો. ખાસ કરીને 5 કિમીની ફન રનમાં જોડાયેલા આશરે 8 હજાર દોડવીરો વચ્ચે ભરૂચના દોડવીરોની હાજરી સૌનું ધ્યાન ખેંચતી રહી હતી. સંસ્થાના સભ્યોએ એકજૂટતાથી દોડ પૂર્ણ કરી સામૂહિક શક્તિ અને સ્વસ્થ જીવનશૈલીનો સંદેશ આપ્યો હતો.
ઉલ્લેખનીય છે કે વડોદરા મેરેથોન છેલ્લા 13 વર્ષથી સતત યોજાઈ રહી છે અને દર વર્ષે તેની લોકપ્રિયતા વધતી જાય છે. આ વર્ષે મેરેથોનમાં કુલ મળીને 1 લાખ 11 હજારથી વધુ દોડવીરોએ ભાગ લઈ નવો રેકોર્ડ નોંધાવ્યો હતો.
‘મોમ્સ ઓફ ભરૂચ’ના દોડવીરોએ સંસ્થાનો ઝંડો લહેરાવતા 5 કિમીની ફન રન સફળતાપૂર્વક પૂર્ણ કરી હતી. તેમની ઉત્સાહભરી હાજરીએ સમગ્ર કાર્યક્રમમાં સકારાત્મક ઊર્જા ફેલાવી હતી અને ફિટનેસ સાથે સામાજિક એકતાનો સુંદર સંદેશ પ્રસરાવ્યો હતો.
