ભરૂચ.
ભરૂચ જીઆઇડીસી વિસ્તારમાં આવેલી તુસાર ટ્રાન્સફોર્મર નામક કંપનીમાં આજે અચાનક આગ લાગવાની ગંભીર ઘટના સામે આવી હતી. બનાવ બનતા જ કંપની પરિસરમાં અફરાતફરીનો માહોલ સર્જાયો હતો અને ધુમાડાના ગોટાળા દૂર સુધી નજરે પડતા આસપાસના ઉદ્યોગોમાં પણ ચિંતા વ્યાપી ગઈ હતી.
આ ઘટનાની જાણ થતાં જ ભરૂચ નગરપાલિકાની ફાયર બ્રિગેડ તેમજ જીએનએફસી કંપનીના લાશ્કરોની ટીમો તાત્કાલિક ઘટનાસ્થળે દોડી આવી હતી. ફાયર બ્રિગેડના જવાનો દ્વારા પરિસ્થિતિની ગંભીરતા સમજી ઝડપી અને સંકલિત કામગીરી હાથ ધરવામાં આવી હતી. આગ વધુ ફેલાય નહીં તેમજ અન્ય યાંત્રિક સાધનો અને કાચા માલને નુકસાન ન થાય તે માટે પાણીના જોરદાર મારો સાથે સતત પ્રયત્નો કરવામાં આવ્યા હતા.
ફાયર ટીમે આગ પર કાબૂ મેળવવા માટે યોગ્ય તકનીકી પદ્ધતિઓ અપનાવી પરિસ્થિતિને નિયંત્રણમાં લીધી હતી. પ્રાથમિક માહિતી મુજબ આગ લાગવાનું ચોક્કસ કારણ હજુ સુધી અકબંધ છે અને સંબંધિત તંત્ર દ્વારા બનાવની તપાસ શરૂ કરવામાં આવી છે.
સદભાગ્યે આ સમગ્ર ઘટનામાં કોઈ જાનહાનિ અથવા ઇજાની નોંધ નથી. સમયસર ફાયર વિભાગની ટીમો પહોંચી જતા મોટી દુર્ઘટના ટળી હોવાનું માનવામાં આવે છે. હાલ પરિસ્થિતિ સંપૂર્ણપણે કાબૂમાં હોવાનું સૂત્રો દ્વારા જાણવા મળે છે.
