નર્મદા નદીના પટ્ટમાં બાર્જ દ્વારા ચાલી રહેલા સાદી રેતીના ગેરકાયદે ખનન સામે તંત્રએ કડક વલણ અપનાવી મોટું ઓપરેશન હાથ ધર્યું છે. મળેલી ફરિયાદોના આધારે ભરૂચ અને વડોદરા જિલ્લાના ભૂસ્તરશાસ્ત્રી વિભાગોની સંયુક્ત ટીમે તા. ૧૮ ફેબ્રુઆરીથી ૨૦ ફેબ્રુઆરી, ૨૦૨૬ સુધી સતત ત્રણ દિવસ સુધી દરોડા પાડી કરોડો રૂપિયાનું ગેરકાયદે ખનન ઝડપ્યું હતું.
તપાસ દરમિયાન ભરૂચ જિલ્લાના ટોઠિદરા ગામ તેમજ કરજણ તાલુકોના ઓઝ અને પોર ગામ નજીકના નદીપટ્ટ વિસ્તારમાં આકસ્મિક ચકાસણી હાથ ધરાઈ હતી. દરોડા દરમિયાન ગેરકાયદે રીતે રેતી ઉપાડતા માફિયાઓ પર સપાટો બોલાવી મોટી સંખ્યામાં મશીનરી અને સાધનો કબજે કરવામાં આવ્યા હતા.
અધિકારીઓએ માહિતી આપતાં જણાવ્યું હતું કે ભરૂચ જિલ્લામાંથી ૦૫ બાર્જ અને ૦૫ યાંત્રિક નાવડીઓ સીઝ કરવામાં આવી છે, જ્યારે વડોદરા જિલ્લામાંથી કુલ ૨૭ બાર્જ ઝડપી પાડવામાં આવ્યા છે. આમ કુલ ૩૨ બાર્જ અને ૦૫ યાંત્રિક નાવડીઓ મળી અંદાજિત રૂ. ૩.૨૦ કરોડનો મુદ્દામાલ કબજે લેવાયો છે.
હાલ તમામ જપ્ત કરાયેલા સાધનો કબજામાં રાખી જવાબદારો સામે કાયદેસરની કાર્યવાહી શરૂ કરવામાં આવી છે તેમજ દંડકીય રકમની વસૂલાતની પ્રક્રિયા હાથ ધરવામાં આવી છે. ખાણ-ખનિજ વિભાગની આ કડક કાર્યવાહીથી નદીપટ્ટ વિસ્તારમાં ગેરકાયદે ખનન કરતા તત્વોમાં ફફડાટ વ્યાપી ગયો છે.
