ભરૂચ.
ભરૂચ શહેરના મોટા નાગોરીવાડ વિસ્તારમાં રહેતો. અતુલ વિજય વસાવા ગઇકાલે ધૂળેટીના પર્વને લઇને કંપનીમાં રજા હોઇ તે ઘરે જ હતો. દરમિયાનમાં સાંજના સાડા સાતેક વાગ્યાના અરસામાં સિંધીવાડના ટેકરા વિસ્તારમાં રહેતો સાહિલ વસાવાએ તેને ફોન કરી તું હોસ્ટેલ ગ્રાઉન્ડ ખાતે આવ તારી સાથે વાતચીત કરવી છે. જેથી તે બાઇક લઇનેહોસ્ટેલ ગ્રાઉન્ડ પાસે ગયો હતો. જે બાદ તે હોસ્ટેલ ગ્રાઉન્ડથી સિટી સર્વેની ઓફિસ તરફ જવાના રોડ પર સાહિલ વસાવા તેમજ તેનો મિત્ર રોહન વસાવા ત્યાં મળ્યો હતો. સાહિલે તેને પુછ્યું હતું કે, તે અગાઉ કેમ મારા પિતરાઇ ભાઇ રાહુલ વસાવા સાથે બોલાચાલી કરી હતી. જેથી અતુલે તેેને જણાવ્યું હતું કે, તેની બહેન સાથે રાહુલ પ્રેમસંબંધ રાખતો હોઇ તેની સાથે તે બાબતે બોલાચાલી થઇ હતી. જેના પગલે સાહિલે અચાનક ઉશ્કેરાઇ જઇ તેની સાથે ઝઘડો કર્યો હતો. મામલો ગરમાતાં સાહિલ વસાવા તેમજ તેના મિત્ર રોહન વસાવાએ મળી તેને માર મારી ગંભીર ઇજાઓ પહોંચાડતાં પોલીસે ગુનો નોંધી આગળની કાયદેસરની કાર્યવાહી કરી હતી.
