ભરૂચમાં GSRDC દ્વારા બનાવવામાં આવેલા જંબુસર ચોકડી ઉપરના બ્રિજના નિર્માણને વર્ષો વીતી ગયા હોવા છતાં સર્વિસ રોડની કામગીરી આજે પણ અધૂરી રહેતા સ્થાનિકોમાં ભારે રોષ જોવા મળી રહ્યો છે.
બ્રિજના સર્વિસ રોડ પર સ્ટ્રીટ લાઇટની સુવિધાનો પણ અભાવ હોવાથી ખાસ કરીને રાત્રિના સમયે વાહનચાલકો અને રાહદારીઓને ભારે મુશ્કેલીનો સામનો કરવો પડી રહ્યો છે. સ્થાનિકો દ્વારા ભૂતકાળમાં અસંખ્ય રજૂઆતો કરવામાં આવી હોવા છતાં તંત્ર દ્વારા કોઇ ચોક્કસ કાર્યવાહી કરવામાં આવી નથી.
આ મુદ્દે ભરૂચ શહેર કોંગ્રેસ દ્વારા વિરોધ પ્રદર્શન યોજવામાં આવ્યું હતું. પરંતુ કોંગ્રેસના કાર્યકરો વિરોધ માટે આગળ વધતા પહેલા જ પોલીસનો કાફલો તેમને રોકવા માટે પહોંચી ગયો હતો. દરમિયાન પોલીસ અને કોંગ્રેસના કાર્યકરો વચ્ચે ઘર્ષણ જેવી સ્થિતિ સર્જાઈ હતી.
કોંગ્રેસના આગેવાનો દ્વારા આક્ષેપ કરવામાં આવ્યો કે “પોલીસ પ્રજાની મિત્ર” હોવાનો સૂત્ર હવે માત્ર નામ પૂરતો રહી ગયો છે અને પોલીસ પ્રજાની સમસ્યાઓ ઉકેલવા બદલે સરકારનો હાથો બની વિરોધ દબાવવાનો પ્રયાસ કરી રહી છે.
પરિસ્થિતિ વધુ ઉગ્ર બનતા પોલીસે કોંગ્રેસના આગેવાનો અને કાર્યકરોની અટકાયત કરી કાયદો અને વ્યવસ્થા જાળવવા કાર્યવાહી હાથ ધરી હતી.
