ભરૂચ જિલ્લા પોલીસના ઉચ્ચ અધિકારીઓના માર્ગદર્શન હેઠળ અંકલેશ્વર શહેરમાં અસામાજિક પ્રવૃત્તિઓ સામે ચાલી રહેલી ઝુંબેશ દરમિયાન અંકલેશ્વર શહેર ‘એ’ ડિવિઝન પોલીસ સ્ટાફે જુગાર પર સફળ રેઇડ કરી 6 શખ્સોને ઝડપી પાડ્યા હતા.
પ્રાપ્ત માહિતી અનુસાર, અંકલેશ્વર શહેરની નવીનગરી વિસ્તારમાં રહેતી ભારતીબેન જયંતિભાઈ વસાવાના રહેણાંક ઘર પાસે ખુલ્લી વાડાવાળી જગ્યામાં કેટલાક ઈસમો ઇલેક્ટ્રિક લાઇટના અજવાળે પત્તાં વડે હારજીતનો જુગાર રમી રહ્યા હોવાની બાતમી પોલીસને મળી હતી. બાતમીના આધારે પોલીસે પંચો સાથે સ્થળ પર પહોંચી વોચ ગોઠવી હતી.
પોલીસે સ્થળને કોર્ડન કરીને દરોડો પાડતા જુગાર રમતા કેટલાક શખ્સો ભાગવાનો પ્રયાસ કર્યો હતો. જોકે, પોલીસે દોડી જઈ 6 આરોપીઓને ઝડપી પાડ્યા હતા, જ્યારે એક વોન્ટેડ આરોપી ફરાર હોવાનું સામે આવ્યું છે.
દરોડા દરમિયાન પોલીસે ₹14,300 રોકડા, 4 મોબાઇલ ફોન કિંમત ₹25,000, મળી કુલ ₹39,300નો મુદ્દામાલ જપ્ત કર્યો હતો.
ઝડપાયેલા આરોપીઓ સામે અંકલેશ્વર શહેર ‘એ’ ડિવિઝન પોલીસ સ્ટેશન ખાતે જુગારધારા કલમ-12 હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. પોલીસે ફરાર આરોપીને ઝડપી પાડવા વધુ તપાસ શરૂ કરી છે.
