ભરૂચ.
ભરૂચ શહેરના શક્તિનાથ નજીક આવેલા મુક્તિનગર વિસ્તારમાં ભારે પવનના કારણે એક વૃક્ષ મૂળમાંથી ધરાશાયી થતાં તેની નીચે પાર્ક કરેલી એક કાર અને એક બાઈક દબાઈ ગયાં હતાં. ઘટનામાં બંને વાહનોને ભારે નુકસાન થયું હોવાનું જાણવા મળ્યું છે. જોકે, સદનસીબે કોઈ જાનહાનિ ન થતાં સ્થાનિકોએ હાશકારો અનુભવ્યો હતો.
પ્રાપ્ત માહિતી અનુસાર, કાર અને બાઈકના માલિકોએ પોતાના વાહનો વૃક્ષની છાયામાં પાર્ક કર્યા હતા. દરમિયાન ભારે પવન ફૂંકાતાં વૃક્ષ અચાનક મૂળમાંથી તૂટી પડ્યું હતું અને બંને વાહનો તેની નીચે દબાઈ ગયાં હતાં.
ઘટનાની જાણ થતાં જ ભરૂચ નગરપાલિકાના લાશ્કરો તાત્કાલિક સ્થળ પર દોડી આવ્યા હતા. ટીમે મશીનોની મદદથી વૃક્ષની ડાળીઓ કાપીને રસ્તો ખુલ્લો કરવાની સાથે દબાયેલા બંને વાહનોને બહાર કાઢવાની કામગીરી હાથ ધરી હતી.
ઘટનામાં કોઈ વ્યક્તિને ઈજા કે જાનહાનિ થઈ ન હતી, પરંતુ કાર અને બાઈકને નોંધપાત્ર નુકસાન થયું હોવાનું જાણવા મળ્યું છે.
