પશ્ચિમ રેલવેએ મુસાફરોને ભારતીય રેલવેની સત્તાવાર ‘રેલવન’ (RailOne) એપનો વધુમાં વધુ ઉપયોગ કરવા અપીલ કરી છે. આ એક સંકલિત મોબાઇલ એપ છે, જેમાં રેલવે સંબંધિત અનેક સેવાઓ એક જ ડિજિટલ પ્લેટફોર્મ પર ઉપલબ્ધ કરાવવામાં આવી છે.
પશ્ચિમ રેલવેના મુખ્ય જનસંપર્ક અધિકારી વિનીત અભિષેક દ્વારા જણાવાયું છે કે મુસાફરો રેલવન એપ મારફતે રિઝર્વ ટિકિટ, અનરિઝર્વ ટિકિટ તેમજ પ્લેટફોર્મ ટિકિટ સરળતાથી બુક કરી શકે છે. ઉપરાંત ટ્રેન સર્ચ, PNR સ્ટેટસ, કોચ પોઝિશન, લાઇવ ટ્રેન ટ્રેકિંગ, ફૂડ ઓર્ડર, રિફંડ અરજી અને રેલ મદદ જેવી અનેક સેવાઓ પણ એક જ એપમાં ઉપલબ્ધ છે.
ડિજિટલ ટિકિટિંગને પ્રોત્સાહન આપવા માટે રેલવેએ 31 માર્ચ, 2027 સુધી રેલવન એપ દ્વારા બુક કરાયેલી અનરિઝર્વ ટિકિટો પર ડિજિટલ પેમેન્ટ માટે 3% છૂટ ચાલુ રાખવાનો નિર્ણય લીધો છે.
જો મુસાફર R-Wallet મારફતે ચુકવણી કરશે તો તેમને 3% કેશબેક મળશે, જ્યારે અન્ય ડિજિટલ પેમેન્ટ માધ્યમોથી ચુકવણી કરવા પર 3% ડિસ્કાઉન્ટ મળશે. આ યોજનાનો હેતુ વધુને વધુ મુસાફરોને ડિજિટલ ટિકિટિંગ તરફ પ્રોત્સાહિત કરવાનો છે.
વિનીત અભિષેકે મુસાફરોને રેલવન એપ ડાઉનલોડ કરી તેની તમામ સંકલિત સેવાઓનો લાભ લેવા અનુરોધ કર્યો હતો. તેમના જણાવ્યા મુજબ, આ એપ મુસાફરોને એક જ વિન્ડોમાં તમામ મહત્વપૂર્ણ રેલવે સેવાઓ ઉપલબ્ધ કરાવી મુસાફરીને વધુ સરળ, સ્માર્ટ અને સુવિધાજનક બનાવે છે.
