ભરૂચ :
આમોદ પંથકમાં મગરોનો પગપેસારો હવે ચિંતાજનક સ્તરે પહોંચી ગયો છે. અગાઉ પૂરસા અને આમોદ પશુ દવાખાના રોડ પર મગર દેખાયાની ઘટનાઓની શાહી હજુ સૂકાઈ નથી ત્યાં જ આજે આમોદના વાડિયા ગામના માર્ગ પર આશરે ૧૩ ફૂટ લાંબો મહાકાય મગર લટાર મારતો નજરે પડ્યો હતો.
બપોરના કે સામાન્ય સમયે જાહેર માર્ગ પર આટલા કદાવર મગરને જોઈને લોકોમાં કુતૂહલની સાથે ભારે ભય વ્યાપી ગયો હતો. મગરને જોવા માટે લોકોના ટોળાં એકઠા થઈ ગયા હતા, જેને કારણે ટ્રાફિક અને સલામતીની સમસ્યા સર્જાતા આમોદ પોલીસ તાત્કાલિક ઘટનાસ્થળે દોડી આવી હતી અને ભીડને ખસેડી હતી. આ દરમિયાન વન વિભાગની રેસ્ક્યુ ટીમે પણ સમયસર પહોંચીને ભારે સાવચેતી સાથે વિશાળ મગરને સુરક્ષિત રીતે પાંજરે પૂરી લીધો હતો. સ્થાનિક રહીશોનું માનવું છે કે વન વિભાગે આ વિસ્તારમાં કાયમી પેટ્રોલીંગ કે સલામતી માટે નક્કર પગલાં ભરવા જોઈએ જેથી કોઈ મોટી દુર્ઘટના ન સર્જાય.
