ભરૂચ :
ભરૂચ શહેરમાં માદક પદાર્થોના ગેરકાયદે કારોબાર સામે બી ડિવિઝન પોલીસે કાર્યવાહી કરી 76 ગ્રામ MD ડ્રગ્સના જથ્થા સાથે 23 વર્ષીય યુવકને ઝડપી પાડ્યો છે. ત્રણકુવા ફાટક નજીક હાથ ધરાયેલી આ કાર્યવાહીમાં પોલીસે ડ્રગ્સ ઉપરાંત એક્ટિવા અને મોબાઈલ ફોન સહિત કુલ રૂ.2.88 લાખનો મુદ્દામાલ કબજે કર્યો છે. ઝડપાયેલા યુવક પાસેથી મળી આવેલા ડ્રગ્સનો જથ્થો ક્યાંથી લાવવામાં આવ્યો હતો અને તેની હેરફેરમાં અન્ય કોઈની સંડોવણી છે કે કેમ તે દિશામાં પોલીસે તપાસ તેજ કરી છે.
પ્રાપ્ત વિગતો અનુસાર, ભરૂચ બી ડિવિઝન પોલીસની ટીમે ત્રણકુવા ફાટક નજીક તપાસ દરમિયાન સોન તલાવડી વિસ્તારમાં રહેતા ધ્રુવ નરેશભાઈ ગોહિલ (ઉં.વ.23)ને ઝડપી પાડ્યો હતો. તેની તપાસ દરમિયાન 76 ગ્રામ MD ડ્રગ્સનો જથ્થો મળી આવતાં પોલીસે તેને કબજે લઈ કાયદેસરની કાર્યવાહી હાથ ધરી હતી.
પોલીસે આરોપી પાસેથી રૂ.2,28,000ની કિંમતનું 76 ગ્રામ MD ડ્રગ્સ, રૂ.50,000ની કિંમતનું એક્ટિવા અને રૂ.10,000ની કિંમતનો મોબાઈલ ફોન મળી કુલ રૂ.2,88,000નો મુદ્દામાલ જપ્ત કર્યો છે.
ભરૂચ શહેરમાં યુવાનોને નશાના દૂષણથી બચાવવા અને માદક પદાર્થોના ગેરકાયદે વેપાર પર અંકુશ લાવવાના હેતુથી પોલીસ દ્વારા કાર્યવાહી હાથ ધરવામાં આવી રહી છે. આ કેસમાં ઝડપાયેલા યુવક પાસેથી મળી આવેલા ડ્રગ્સનો જથ્થો ક્યાંથી લાવવામાં આવ્યો હતો, કોને પહોંચાડવાનો હતો અને તેની પાછળ કોઈ મોટું નેટવર્ક કાર્યરત છે કે કેમ તે અંગે પોલીસ તપાસ કરી રહી છે. તપાસ દરમિયાન અન્ય કોઈની સંડોવણી બહાર આવે છે કે કેમ તે જોવું રહ્યું.
