ભરૂચ:
Advertisement
ભરૂચ જિલ્લામાં આરોગ્ય સેવાઓનું સ્તર સુધારવા અને નિયમન લાવવાના હેતુથી ‘ધ ગુજરાત ક્લિનિકલ એસ્ટાબ્લિશમેન્ટ (રજિસ્ટ્રેશન એન્ડ રેગ્યુલેશન) એક્ટ-2021’ નું પાલન કરાવવા માટે જિલ્લા આરોગ્ય તંત્ર કડક મૂડમાં આવ્યું છે. ભરૂચ સિવિલ હોસ્પિટલના સિવિલ સર્જન ડૉ. વી.આર. ઉપાધ્યાયે તમામ તબીબો અને તબીબી સંસ્થાઓને આગામી 31 ઓક્ટોબર સુધીમાં ફરજિયાતપણે રજિસ્ટ્રેશન પ્રક્રિયા પૂર્ણ કરી લેવા આદેશ આપ્યો છે.
આંકડાકીય માહિતી અનુસાર, ભરૂચ જિલ્લાની કુલ 2,288 તબીબી સંસ્થાઓમાંથી અત્યાર સુધીમાં માત્ર 1,193 સંસ્થાઓએ જ સર્ટિફિકેટ મેળવ્યાં છે. બાકી રહેલી 1,000થી વધુ સંસ્થાઓમાં સમયસર રજિસ્ટ્રેશન પૂર્ણ કરાવવું એ તંત્ર માટે એક મોટો પડકાર બની રહ્યો છે.
કઈ સંસ્થાઓ અને તબીબોને કાયદો લાગુ પડશે? સિવિલ સર્જનના જણાવ્યા અનુસાર, આ કાયદો આરોગ્ય ક્ષેત્ર સાથે જોડાયેલી તમામ નાની-મોટી સંસ્થાઓ માટે અનિવાર્ય છે: ચિકિત્સા પદ્ધતિઓ: એલોપેથિક, આયુર્વેદિક, હોમિયોપેથિક વગેરે તમામ પદ્ધતિઓ. તબીબો: જનરલ પ્રેક્ટિશનરો, સ્પેશિયાલિસ્ટ તથા સુપર સ્પેશિયાલિસ્ટ તબીબો. સંસ્થાઓ: નાના ક્લિનિક્સ, મલ્ટિસ્પેશિયાલિટી હોસ્પિટલો, પેથોલોજી લેબોરેટરીઓ અને લાગુ પડતી સરકારી આરોગ્ય સંસ્થાઓ.
નહીં કરાવનાર સામે દંડાત્મક કાર્યવાહીની ચેતવણી રાજ્ય સરકારના અગ્ર સચિવ અને ભરૂચ જિલ્લા કલેક્ટર દ્વારા કાયદાના અમલીકરણ અંગે કડક સૂચનાઓ આપવામાં આવી છે. જો 31 ઓક્ટોબર સુધીમાં રજિસ્ટ્રેશન કરાવવામાં નહીં આવે અને આરોગ્ય વિભાગની તપાસ દરમિયાન કોઈ સંસ્થા અનરજિસ્ટર્ડ જણાશે, તો કાયદાકીય જોગવાઈઓ મુજબ ભારે દંડ અને કાનૂની કાર્યવાહી હાથ ધરવામાં આવશે.
ઓનલાઇન અરજી કેવી રીતે કરવી? તબીબો અને સંચાલકો છેલ્લી ઘડીની રાહ જોયા વગર સરકારી પોર્ટલ clinicalestablishment.gipl.in પર જઈને ઓનલાઇન રજિસ્ટ્રેશન કરી શકે છે. વધુ માહિતી કે માર્ગદર્શન માટે ભરૂચ સિવિલ હોસ્પિટલનો સંપર્ક કરવા જણાવાયું છે.
