ભરૂચ
ભરૂચ શહેરના મકતમપુર સ્થિત નર્મદા બંગ્લોઝમાં ગત ૧૩ ઓક્ટોબરે થયેલી રૂ. ૧.૮૨ લાખની સનસનાટીભરી ચોરીનો ભરૂચ લોકલ ક્રાઈમ બ્રાન્ચે (LCB) પર્દાફાશ કર્યો છે. અમદાવાદના ખોખરા વિસ્તારમાં દરોડો પાડી પોલીસે સાબુગઢ ઝૂંપડપટ્ટીના એક તસ્કરને ચોરીના મોબાઈલ સાથે ઝડપી પાડ્યો છે.
ગત ૧૩ ઓક્ટોબરે મકતમપુર નજીકના નર્મદા બંગ્લોઝમાં તસ્કરો ત્રાટક્યા હતા. મકાનનો દરવાજાનો નકૂચો તોડી અંદર પ્રવેશેલા તસ્કરોએ લોખંડની તીજોરી તોડીને સોનાના દાગીના અને રોકડા રૂપિયા મળી કુલ રૂ. ૧,૮૨,૫૪૮ ની મત્તાની ચોરી કરી ફરાર થઈ ગયા હતા. આ અંગે ભરૂચ સી-ડિવિઝન પોલીસ સ્ટેશનમાં ગુનો નોંધાતા તપાસ એલસીબીને સોંપાઈ હતી.
વડોદરા રેન્જ આઈજી સંદીપ સિંહ અને ભરૂચ એસપી અક્ષયરાજની સૂચનાથી LCB PI એમ.પી. વાળાની ટીમે તપાસનો ધમધમાટ શરૂ કર્યો હતો. PSI એ.વી. શિયાળીયા અને તેમની ટીમે સીસીટીવી એનાલિસિસ તથા ટેકનિકલ સર્વેલન્સના આધારે બાતમી મેળવી હતી કે, ચોરીમાં ભરૂચની સાબુગઢ ઝૂંપડપટ્ટીનો સતનામ સિલીગર સંડોવાયેલો છે અને હાલ અમદાવાદના ખોખરામાં છુપાયો છે. એલસીબીની ટીમે તાત્કાલિક અમદાવાદ પહોંચી વોચ ગોઠવીને સતનામની અટકાયત કરી હતી.
પોલીસની કડક પૂછપરછમાં આરોપી સતનામ ભાંગી પડ્યો હતો. તેણે કબૂલાત કરી હતી કે તેણે પોતાના સાગરીતો લખનસિંગ બાવરી અને સંજય વસાવા સાથે મળીને નર્મદા બંગ્લોઝમાં ચોરી કરી હતી. પોલીસે આરોપી પાસેથી રૂ. ૫,૦૦૦ ની કિંમતનો મોબાઈલ જપ્ત કરી તેને સી-ડિવિઝન પોલીસને સોંપ્યો છે, જ્યારે અન્ય બે ફરાર સાગરીતોની શોધખોળ હાથ ધરી છે.
