અંકલેશ્વર:
ભરૂચ જિલ્લા પોલીસની એન્ટી નાર્કોટિક્સ વિંગે અંકલેશ્વર GIDC વિસ્તારમાં ગાંજાના ગેરકાયદે વેચાણ સામે કાર્યવાહી કરી બે આરોપીઓને ઝડપી પાડ્યા છે. પોલીસની ટીમે રચના નગરમાં ફાટક પાસે પાનના ગલ્લા નજીક દરોડો પાડી ૧.૮૮૦ કિલોગ્રામ ગાંજો અને બુલેટ સહિત કુલ રૂ.૨.૧૫ લાખનો મુદ્દામાલ કબજે કર્યો છે.
પોલીસના જણાવ્યા અનુસાર, બાતમીના આધારે રચના નગરમાં ફાટક પાસે પાનના ગલ્લા નજીક તપાસ હાથ ધરવામાં આવી હતી. આ દરમિયાન રાજુ ગણેશ ગામીત અને સચિન પન્નાલાલ ગુપ્તા ગાંજાનો જથ્થો વેચાણના ઇરાદે રાખતા હોવાનું સામે આવ્યું હતું. પોલીસે બંનેની ધરપકડ કરી તેમની પાસેથી અંદાજે રૂ.૯૪ હજારની કિંમતનો ૧.૮૮૦ કિલોગ્રામ ગાંજો કબજે કર્યો હતો.
આ ઉપરાંત રૂ.૧ લાખની કિંમતની બુલેટ મોટરસાઇકલ, બે મોબાઇલ ફોન, ડિજિટલ વજનકાંટો અને અન્ય સામગ્રી પણ કબજે કરવામાં આવી છે. આમ, પોલીસે કુલ રૂ.૨.૧૫ લાખનો મુદ્દામાલ જપ્ત કર્યો છે.
પ્રાથમિક તપાસ દરમિયાન ભડકોદરા ખાતે રહેતા અન્ય એક શખ્સનું નામ પણ બહાર આવ્યું છે. આ મામલે અંકલેશ્વર GIDC પોલીસ મથકે એન.ડી.પી.એસ. એક્ટની વિવિધ કલમો હેઠળ ગુનો નોંધી વધુ તપાસ હાથ ધરવામાં આવી છે. ગાંજાનો જથ્થો ક્યાંથી લાવવામાં આવ્યો હતો અને આ નશાના કારોબારમાં અન્ય કોણ સંડોવાયેલું છે તે દિશામાં પોલીસ તપાસ કરી રહી છે.
