ભરૂચનાં વડદલા નજીક લકઝરી બસ પલટી ખાતા અફરાતફરીનું વાતાવરણ સર્જાયું.

સુરત નગરમાં કોરોના મહામારી વધુ ફેલાતા સુરતમાં વસતા સૌરાષ્ટ્રનાં રહેવાસીઓએ પોતાના વતનની વાટ પકડી છે ત્યારે સુરતથી સૌરાષ્ટ્ર તરફ જતી એક લકઝરી બસ વડદલા નજીક પલટી ખાઈ ગઈ હતી. આ અંગે વધુ વિગત જોતાં સુરતથી સૌરાષ્ટ્ર અમરેલી વિસ્તાર તરફ જતી એક ખાનગી લકઝરી બસ ભરૂચ નજીક આવેલ રાષ્ટ્રીય ધોરીમાર્ગ વડદલા પાસેથી પસાર થઈ રહી હતી ત્યારે ડ્રાઇવરે અચાનક સ્ટિયરિંગ પરનો કાબૂ ગુમાવતાં લકઝરી બસ પલટી ખાઈ ગઈ હતી. બસમાં સવાર 30 થી વધુ લોકોનો આબાદ બચાવ થવા પામ્યો હતો. લકઝરી બસમાં બેઠેલ તમામ મુસાફરોને એમ થયું હતું કે મોટો અકસ્માત થયો છે જેના પગલે મહિલાઓ અને બાળકોએ ચિચિયારી પાડતા અફરાતફરીનું વાતાવરણ સર્જાયું હતું. ચિચિયારી સાંભળતા વડદલા ગામનાં લોકો ઘટનાસ્થળે આવી પહોંચતા લોકોનું ટોળું ભેગું થઇ ગયું હતું. સમગ્ર ઘટનાક્રમના પગલે રાષ્ટ્રીય ધોરીમાર્ગ પર ટ્રાફિકજામ સર્જાયો હતો. જોકે ટ્રાફિક પોલીસ અસરકારક કામગીરી કરતાં રાબેતા મુજબનો ટ્રાફિક શરૂ થયો હતો.