ભરૂચ જિલ્લામાં આજે સવારથી જ અગ્નિ તાંડવ જોવા મળ્યું હતું. સવારના સમયે અંકલેશ્વર જીઆઇડીસી વિસ્તારમાં આવેલ સોલ્વન્ટના એક ગોડાઉનમાં આગ લાગવાની ઘટના સર્જાઈ હતી તો તેના ગણતરીના સમયમાં જ ભરૂચ જીઆઇડીસી વિસ્તારમાં આવેલ એક ખાનગી કંપનીમાં પણ આગ ફાટી નીકળતા ભારે દોડધામ મચી હતી.
ભરૂચ જીઆઇડીસી વિસ્તારમાં આવેલ પેટ્રોકેમ કંપની waxoil માં આજરોજ અચાનક આગ ફાટી નીકળતા ઉપસ્થિત લોકો સહિત કર્મચારીઓમાં નાસભાગ મચી હતી, જોત જોતામાં આગ વિકરાળ બનતા આગના ધુમાડાના ગોટેગોટા દુરદુર સુધી નજરે પડ્યા હતા.
ઘટના અંગેની જાણ ભરૂચ નગરપાલિકાના ફાયર વિભાગમાં કરવામાં આવતા ફાયર ના કર્મીઓએ લાય બંબા લઇ તાત્કાલિક સ્થળ પર દોડી જઈ આગ પર પાણીનો મારો ચલાવી તેને કાબુમાં લેવાની તજવીજ શરૂ કરી હતી. હાલ આ આગ કયા કારણોસર લાગી છે તે અંગે જાણી શકાયું નથી જોકે આગના પગલે કંપનીમાં મોટું નુકશાન થયું હોવાનું ચર્ચાઈ રહ્યું છે.
હારુન પટેલ : ભરૂચ
