ભરૂચ તાલુકાના દયાદરા ગામ પાસે ગત રાત્રીના સમયે એક ઉભેલી ટ્રકમાં અચાનક ભીષણ આગ ફાટી નીકળતા ઉપસ્થિત લોકોમાં ભારે નાસભાગ મચી હતી, જોતજોતામાં આગની જવાળાઓ ટ્રકના અંદરના ભાગે પ્રસરી જતા ટ્રક આખે આખી આગની લપેટમાં આવી હતી, અચાનક ટ્રકમાં લાગેલ આગના પગલે આસપાસ ઉપસ્થિત લોકોમાં એક સમયે ગભરાટનો માહોલ છવાયો હતો.
રસ્તાની બાજુમાં એક ખાનગી હોટલ પાસે ઉભેલી ટ્રક ભડકે બળતા સ્થળ પર ઉપસ્થિત લોકોએ નજીકની દુકાનોમાંથી પાણીના કુલર તેમજ ડોલો લઈ દોડી ગયા હતા અને આગની જવાળાઓ વચ્ચે રહેલ ટ્રક પર પાણીનો મારો ચલાવી તેને કાબુમાં લેવાના પ્રયાસ કર્યા હતા, આશરે 20 મિનિટ સુધી ટ્રક આગની લપેટમાં રહી હતી.
ઘટના અંગેની જાણ ભરૂચ ફાયર વિભાગમાં કરવામાં આવતા ફાયરના કર્મીઓ પણ તાત્કાલિક સ્થળ પર દોડી ગયા હતા અને સ્થાનિકોની મદદથી ગણતરીના સમયમાં આગને કાબુમાં લીધી હતી, ઉભેલી ટ્રકમાં શોર્ટસર્કિટના કારણે આગ લાગી હોવાનું પ્રાથમિક અનુમાન લગાવાઈ રહ્યું છે. જોકે સમગ્ર ઘટનામાં સદનસીબે કોઈ પણ પ્રકારની જાનહાની ન થતા લોકોએ રાહતનો શ્વાશ લીધો હતો.
