ભરૂચ રેલવે સ્ટેશનનો વિસ્તાર નશાનો વેપલો કરતા તત્વો માટે આશીર્વાદ રૂપી બની રહ્યો હોય તેમ લાગી રહ્યું છે, બુટલેગરો દિવસ દરમ્યાન ખેપિયાઓ પાસે અલગ -અલગ ટ્રેન મારફતે વિદેશી શરાબનો જથ્થો બિન્દાસ અંદાજમાં મંગાવી ભરૂચના દક્ષિણ અને પશ્ચિમ સહિતના વિસ્તારોમાં પહોંચાડયા બાદ છૂટકમાં વેચાણ કરતા હોવાનું ચર્ચાઈ રહ્યું છે.
ભરૂચ રેલવે સ્ટેશન પર બુટલેગરો અને પોલીસની સાઠ ગાંઠ એટલી હદે હવે વિકસિત બની છે કે પ્લેટફોર્મ નંબર 1 અને 2 નું ફૂટ ઑવરબ્રિજ ઉતરતા જ નર્મદા નદી તરફ આવતા ટી સ્ટોલ પર પોલીસ કર્મીઓની પાસે બેસી બુટલેગરો બિન્દાસ અંદાજમાં પોતાના સાગરીતોની રાહ જોતા હોય તેવા દ્રશ્યો સામે આવ્યા છે, જ્યાં પોલીસ કર્મીઓ અને બુટલેગર ચાઇ પર ચર્ચાઓ કરતા નજરે પડી રહ્યા છે તેવામાં આ પ્રકારની બુટલેગરો અને પોલીસની જુગલબંદીથી પોલીસના ખબરીઓ અને કેટલાય જાગૃત નાગરિકોની સુરક્ષા અને ગુપ્તનિયતા ઉપર પણ ખતરા સમાન સ્થિતિ સર્જાય તો જવાબદાર કોણ તેવી બાબતો ચર્ચાનું કેન્દ્ર બની છે.
ભરૂચ રેલવે પોલીસ અને બુટલેગરોની બાકડે બેસી ચાઇ પર ચર્ચા અને રેલવેની હદમાં બિન્દાસ ફરતા બુટલેગરોની કરતુતો જોઈ પોલીસના ખબરીઓમાં ફફડાટનો માહોલ છવાયો છે તો બીજી તરફ કહેવાઈ રહ્યું છે કે આ બુટલેગરો અને પોલીસ કર્મીઓ ચા પાણી કરતા કરતા કેટલાય લોકોની મશ્કરીઓ પણ કરતા હોય સામાન્ય લોકોમાં પણ ભયનો માહોલ જોવા મળતો હોય છે.
ભરૂચ રેલવે સ્ટેશનના પ્લેટફોર્મ ઉપર જ બુટલેગરો અને પોલીસના સાઠ ગાંઠની ઘટનાઓ રેલવેની સુરક્ષા સામે પણ સવાલો ઉભા કરી રહ્યા છે તો બીજી તરફ રેલવેની હદમાંથી જ શહેર તરફ બિન્દાસ અંદાજમાં નીકળતા વિદેશી શરાબનો જથ્થો રેલવે પોલીસના કર્મીઓની કામગીરી ઉપર પણ શંકા ઉપજાવે તેમ છે તેવી ચર્ચાઓએ જોર પકડ્યું છે.
ભરૂચ રેલવે સ્ટેશનના પ્લેટફોર્મ પર બુટલેગરો અને પોલીસ કર્મીઓની ચાઇ પર ચર્ચા કરતા જોવા મળતા બુટલેગર ભૂતકાળમાં અનેકવાર રેલવેની જ હદમાંથી શરાબ લાવતો ઝડપાઈ ચુક્યો છે, તેવામાં હવે પોલીસ સાથે ચાની ચુસ્કી લેતા બુટલેગરની સાથે કંઈક રેલવે પોલીસનું રંધાઈ ગયું છે કે પછી સેટિંગ ડોટ કોમ થકી બધું જ છાવરવામાં આવી રહ્યું છે તેવી ચર્ચાઓએ ભારે જોર પકડ્યું છે.
