ભરૂચ સી ડિવિઝન પોલીસે જીએનએફસી બસ સ્ટેન્ડ પરથી ત્રણેયને દબોચ્યાં
ભરૂચ.
ભરૂચ સી ડિવિઝન પોલીસ સ્ટેશનના સ્ટાફને ચોક્કસ બાતમી મળી હતી કે, જીએનએફસી બસ સ્ટેન્ડમાં એક મહિલા સહિત ત્રણ જણા વિદેશીદારૂના જથ્થા સાથે ક્યાંક જવાની ફિરાકમાં છે. જેના પગલે ટીમે તુરંત સ્થળ પર દરોડો પાડી બાતમી મુજબની મહિલા અને બે શખ્સોને ઝડપી પાડ્યાં હતાં. પ્રાથમિક પુછપરછમાં તેમના નામ સતિષ ખોડીદાસ સરધારા, વિપુલ જગદિશ રાઠડ તેમજ મહિલાનું નામ ઉજાલા દિપક રાઠોડ ( ત્રણેય રહે. ભાવનગર) હોવાનું માલુમ પડ્યું હતું. ટીમે તેમની પાસેની ટ્રોલી બેગની તલાશી લેતાં તેમાં વિદેશીદારૂનો જથ્થો ભરેલો જણાયો હતો. જેની ગણતરી કરતાં તેમાં કુલ 1.19 લાખની મત્તાનો વિદેશીદારૂ ભરેલો જણાયો હતો. તેમની પુછપરછમાં તેમણે કબુલ્યું હતું કે, તેઓએ મુંબઇમાં અલગ અલગ સ્થળેથી દારૂનો જથ્થો ખરીદી તેઓ ભાવનગર લઇ જઇ રહ્યાં હતાં. તેઓ એક બસમાં ભરૂચ સુધી આવ્યાં હતાં. હવે તેઓ ભાવનગર જવા માટે બીજી બસની રાહ જોઇરહ્યાં હતાં. પોલીસે તેમની પાસેથી વિેદેશીદારૂ તેમજ બે મોબાઇલ મળી કુલ 1.44 લાખનો મુદ્દામાલ જપ્ત કરી તમામ વિરૂદ્ધ પ્રોહિબિશન એક્ટ હેઠળ ગુનો નોંધી આગળની કાર્યવાહી હાથ ધરી છે.
