ભરૂચ.
નેત્રંગ પોલીસની ટીમ પેટ્રોલિંગમાં હતી તે વેળાં તેમને બાતમી મળી હતી કે, નેત્રંગ લાલ મંટોડી વિસ્તારમાં રહેતો મેહુલ રમણ પરમાર તેના ઘરના પાછળ આવેલી ઓરડીમાં કેટલાંક લોકો સાથે બેસીને જુગારની મહેફિલ જમાવી છે. જેના પગલે ટીમે તુરંત સ્થળ પર પહોંચી દરોડો પાડ્યો હતો. જોકે, પોલીસની રેડ જોઇને એક શખ્સ ત્યાંથી નાસી છુટ્યો હતો. પોલીસે સ્થળ પરથી ચાર જુગારિયા કલીમ કરીમ બિસ્મિલ્લા કુરેશી, મહેશ સોમા વસાવા, મજીદ અબ્બાસ કુરેશી તેમજ સલીમ સાનમહમદ મકરાણીને ઝડપી પાડ્યાં હતાં. ટીમે તેમની પાસેથી દાવપરના તેમજ અંગઝડતીના મળી કુલ 3620 રૂપિયા રોકડા જપ્ત કર્યાં હતાં. પોલીસને જોઇને ભાગી ગયેલાં શખ્સ અંગે પુછતાં તેનું નામ મેહુલ રમણ પરમાર હોવાનું જાણવા મળ્યું હતું. બનાવ સંદર્ભે નેત્રંગ પોલીસે તમામ વિરૂદ્ધ જુગારધારા હેઠળ ગુનો નોંધી ફરાર આરોપીને શોધવાની કવાયત હાથ ધરી છે.
