નિચાણવાળા વિસ્તારોમાં પાણી ભરાતાં વાહન ચાલકોને હાલાકી સર્જાઈ હતી
શાળાએ જતાં વિદ્યાર્થીઓ ભારે વરસાદને કારણે મુશ્કેલીમાં મુકાયાં
। ભરૂચ ।
ભરૂચ શહેર જિલ્લામાં ચોમાસાની મોસમ જામી ગઈ છે. વરસાદી માહોલ રહેવાને કારણે વાતાવરણમાં ભેજનું પ્રમાણ વધતાં લોકોએ ગરમીમાંથી રાહત મેળવી છે. ગુરુવારે વહેલી સવારથી જ શહેર જિલ્લામાં વરસાદે ધબરાટી બોલાવી દીધી હતી. સવારના ૬થી ૮વાગ્યાના સમયગાળામાં હાંસોટમાં ૭૩ મીમી એટલે કે ત્રણ ઈંચ જેટલો વરસાદ નોંધાયો હતો. જ્યારે વાલિયામાં પણ અઢી ઈંચ જેટલો વરસાદ થયો હતો. ભરૂચ શહેર જિલ્લામાં વરસાદી માહોલ જામી ગયો છે. આકાશમાંથી કાચુ સોનું વરસી રહ્યું છે. ત્યારે ખેડૂતો પણ ગેલમાં આવી ગયાં છે.
જિલ્લાભરમાં વરસાદ વરસતાં તાપમાનનો પારો પણ ગગડીને ૩૮થી આસપાસનો થઈ ગયો છે. જેના કારણે વાતાવરણમાં ઠંડક અનુભવાઈ રહી છે. ગુરુવારે વહેલી સવારથી જ જિલ્લાભરમાં વરસાદ વરસવાનો શરુ થઈ ગયો હતો. જેમાં સવારના ૯ વાગ્યાથી ૮વાગ્યા સુધીના માત્ર બે જ કલાકમાં હાંસોટમાં ૩ ઈંચ જ્યારે વાલિયામાં અઢી ઈંચ જેટલો વરસાદ ખાબક્યો હતો. ભારે વરસાદને કારણે નિચાણવાળા વિસ્તારોમાં પાણી ભરાયાં હતાં. બીજી તરફ સવારનો સમય બાળકોનો શાળાએ જવાનો હોવાથી તેઓ પણ ભારે મુશ્કેલીમાં મુકાયાં હતાં. જોકે. એકતરફ જિલ્લામાં રેડ અને ઓરેન્જ એલર્ટ જાહેર કરવામાં આવ્યું હતું ત્યારે હવે આગામી દિવસોમાં વરસાદી માહોલ સામાન્ય થઈ જશે તેવી શક્યતાઓ વ્યક્ત કરવામાં આવી રહી છે.
