શરૂઆતમાં એરસ્ટ્રીપ નાના પેસેન્જર એરક્રાફ્ટ અને કાર્ગો ફ્લાઇટ્સને હેન્ડલ કરવા માટે સજ્જ કરાશે
ભરૂચ.
ભરૂચ જિલ્લાનો અંકલેશ્વરમાં એરપોર્ટનો પહેલો ફેઝ ₹105 કરોડના ખર્ચે ગુજરાતના પાંચમા સૌથી લાંબા રન-વે ના નિર્માણ સાથે પૂર્ણ થઈ ગયો છે.
ભરૂચ જિલ્લાના અંકલેશ્વર ખાતે તબક્કાવાર રીતે ગ્રીનફિલ્ડ એરપોર્ટ બનાવવામાં આવી રહ્યું છે. ગુજરાત સરકારના માર્ગ અને મકાન વિભાગના જણાવ્યા અનુસાર, નવીનતમ સફળતામાં એરસ્ટ્રીપનો વિકાસ પૂર્ણ થયો છે.
રાષ્ટ્રીય ધોરીમાર્ગ 48 ને અડીને આશરે ₹105 કરોડના ખર્ચે બનેલ આ એરસ્ટ્રીપ 2135 મીટર લંબાઈ અને 45 મીટર પહોળાઈ ધરાવે છે. જે ગુજરાતની પાંચમી સૌથી લાંબી એરસ્ટ્રીપ બની ગઈ છે.
આગામી બીજા તબક્કામાં એર ટ્રાફિક કંટ્રોલ ATC ટાવર સહિત આવશ્યક માળખાકીય સુવિધાઓ વિકસાવવામાં આવશે. શરૂઆતમાં એરસ્ટ્રીપ નાના પેસેન્જર એરક્રાફ્ટ અને કાર્ગો ફ્લાઇટ્સને હેન્ડલ કરવા માટે સજ્જ કરવામાં આવશે.
અમરતપુરા ગામ નજીક એરસ્ટ્રીપ પર કામનો પ્રથમ તબક્કો લગભગ પૂર્ણ થઈ ગયો છે. અને કાર્ગો એરક્રાફ્ટ ટૂંક સમયમાં કાર્યરત થવાની અપેક્ષા છે. એકવાર ATC ટાવર તૈયાર થઈ જાય, પછી બોઇંગ કાર્ગો એરક્રાફ્ટ સાથે લેન્ડિંગ અને ટેક-ઓફ પરીક્ષણો કરવાની યોજના છે. આસપાસમાં ઊંચી ઇમારતોનો અભાવ સુરક્ષિત અને સરળ વિમાનોની અવરજવર સુનિશ્ચિત કરશે.
સરકારે વર્ષ 1993 – 94 માં ભરૂચ જિલ્લામાં હવાઈ પટ્ટી બનાવવાની યોજના જાહેર કર્યાના દાયકાઓ પછી, અનેક રજૂઆતોના અંતે 2022 માં વડાપ્રધાન નરેન્દ્ર મોદી દ્વારા આ પ્રોજેક્ટનો શિલાન્યાસ કર્યા પછી આખરે પ્રથમ તબક્કો સાકાર થયો છે.
સ્થાનિક પ્રતિનિધિઓએ પણ વિનંતી કરી છે કે, હવાઈ પટ્ટી ફક્ત કાર્ગો ફ્લાઇટ્સ જ નહીં પરંતુ મુસાફરોની સેવાઓને પણ સુવિધા આપવા વિકસાવવામાં આવે.
