તસ્કરોએ હેક્સો બ્લેડ કે અન્ય કોઈ સાધન વડે શટરનું તાળું કાપી નાંખ્યુ
ભરૂચ.
ભરૂચના ઓરિયન્ટ આર્કેટમાં આવેલી એક મેડિકલ સ્ટોરમાં તસ્કરોએ ગાટકી ૪૭ હજારનો હાથફેરો કર્યો હોવાની ઘટના સામે આવી છે. બનાવને પગલે સી ડિવિઝન પોલીસે ગુનો નોંધવાની કવાયત હાથ ધરી છે.
ભરૂચના ઝાડેશ્વર રોડ પર આવેલાં ઓરિયન્ટ આર્કેટમાં આવેલી ફેમિલી મેડિસન્સ નામની દુકાનને રાત્રીના સમયે તસ્કર ટોળકીએ ટાર્ગેટ બનાવી હતી. તસ્કરોએ રાત્રીના સમયગાળા દરમિયાન મેડિકલ સ્ટોરના શટરનું તાળું કોઈ હથિયાર વડે કાપી નાંખી શટર ખોલી દુકાનમાં પ્રવેશ કર્યો હતો. તસ્કરોએ ગલ્લામાં મુકેલાં રોકડા ૪૭ હજાર તેમજ અન્ય સામાનની ચોરી કરી હતી. તસ્કરોએ કોમ્પ્યુટરની હાર્ડડિસ્ક પણ કાઢી ગયાં હતાં. દુકાનના સંચાલક ચિરાગ ફડદુ સવારે આઠેક વાગ્યાના અરસામાં નિત્યક્રમ મુજબ તેમની મેડિકલ સ્ટોર પર આવતાં તેમણે શટરનું તાળુ કપાયેલી હાલતમાં જોતાં તેમને ધ્રાસકો લાગ્યો હતો. દુકાન ખોલી અંદર જઈ જોતાં દુકાનમાં ચોરી થઈ હોવાનું માલુમ પડતાં તેમણે ભરૂચ સી ડિવિઝન પોલીસ મથકે કરિયાદ નોંધાવવાની કવાયત હાથ ધરી હતી.
